FP Inklina Parpol, PM Rui: Tenke Foti Prosesu Disiplinar

Timoroman.com-Funsionariu Publiku (FP) ne’ebé inklina an iha Partidu Politiku (PARPOL) iha oras servisu nian sei hetan sansaun prosesu disiplinar.

Primeiru Ministru (PM), Rui Maria de Araújo husu ba Funsionariu Publiku tomak atu labele involve an iha Partidu Politiku durante oras servisu nian, maibé se bainhira involve entaun sei foti prosesu disiplinar.

Primeiru Ministru, Rui Maria de Araujo haktuir, lei funsaun publika hateten klaru hela katak, funsionariu hotu-hotu tenki kumpri Lei, tanba iha oras servisu nian sira sai nu’udar servidor de publiku hodi fó atendementu ba ema hotu no la hare ba kor partidu nian.
Kuandu for a de oras servisu nian ne’e livre hanesan sidadaun hodi bele hala’o ninia atividade.

“bainhira iha oras servisu nia laran mak funsionariu publiku ruma akompañia servisu partidu nian, entaun iha lei para ita atu foti prosesu disiplinar hasoru ida ne’e.” dehan Primeiru Ministru, Rui Maria de Araujo iha Palasiu Governu Sesta-Feira foin lalais.
Husu ba sidadaun hotu-hotu kuandu hetan iregularidades sira hanesan ne’e tenke hato’o mai autoridade kompotentes para foti medidas. (sal)