UPF Detein Joven Na’in Rua Lori Atributu Arte Marsiál Husi Indonézia
TIMOROMAN.COM (DILI)—Polísia Nasionál Timor-Leste (PNTL) liu husi Servisu Sekreta Komandu Unidade Patrullamentu Fronteira (UPF) kompañia Bravo Suai, halo detensaun ba joven Timoroan na’in rua iha ponte tafara, Aldeia Tabolo, Suku Kasabauk, Postu Administrativu Tilomar, tanba hatama sasan ilegál hanesan mina-rai no atributu Grupu Arte Marsiál (GAM) husi Ikatan Keluarga Silat Putera Timor-Leste (IKS-PTL) liu husi fronteira Mota-Masin.
“Membru UPF halo operasaun ne’ebé lidera husi Segundu Komandante kompañia hamutuk ho Servisu Sekreta UPF nian, prende karreta tipu mikrolete ida ho númeru matríkula 37.161 no detein joven mane na’in-rua. Sidadaun na’in-rua ne’e halo transaksaun ilegál iha liña fronteira,” Komandante UPF, Superintendente Polísia Euclides Belo hateten iha komunikadu ne’ebé TIMOROMAN.COM asesu, Kinta (16/12/2021).
Superintendente Polísia Euclides Belo fó-sai katak, Joven na’in-rua ne’e ho inisiál TdC tinan 37 husi Salele-Wetaba, Suku Beiseuk, Postu Tilomar ne’ebé hatama mina-rai litru 350 hamutuk masa sanulu.
Alende ne’e, joven ida seluk nu’udár treinadór GAM iha ranting Goroto-Same ho naran inisiál AS tinan 32, husi Aldeia Puscam (kampung 3), Suku Gorotu, Postu-Administrativu Same Vila, ne’ebe na’in ba atributu arte marsiais IKS nian.
Atributu organizasaun IKS nian ne’ebé hatama ilegál iha fronteira no UPF konsege prende iha loron 15 Dezembru mak hanesan farda treina IKS pares 82, kamizola IKS 21, Poster IKS 74, envelope logo IKS 74, kalung Q 42, Masimidar Pengesahan ho logo IKS 78, sertifikadu IKS 1, sabuk 1, poster guru besar 1, ID card IKS 1, Livru IKS 1 no Poster Keluarga Besar IKS 1.
AS hanesan na’in ba atributu organizasaun IKS deklara katak, atributu sira ne’e tama husi Timor-Osidentál liu husi fronteira tasi iha loron 14 Dezembru tuku ida kalan iha área Mota Masin nian ne’ebé fasilita husi timor-oan ida naran EsA tinan 30, hela iha Salele Bot, Suku Lalawa, Postu-Administrativu Tilomar.
Joven na’in-rua hamutuk ho evidénsia sira ne’e entrega ona ba Komandu PNTL Munisípiu Covalima, hodi kontinua ba prosesu investigasaun no sei prosesa tuir lei ne’ebé vigora iha Timor-Leste. (Gracio)
