Kandidatu Traballadór Austrália 39 Simu Sertifikadu
TIMOROMAN.COM (DILI)—Ministru Koordenadór Asuntu Ekonomiku (MKAE) Joaquim Amaral hamutuk ho Embaixadór Austrália iha Timor-Leste Peter Roberts, akompanha ho Diretór Diresaun Nasionál Empregu Exteriór Filomeno Soares, fahe sertifikadu ba formandu kandidatu traballadór Australia na’in 39 ne’ebé tuir ona formasaun kursu preparatóriu mobilidade laborál iha CNEFP-Tibar.
Diretór Diresaun Nasionál Empregu Exteriór Filomeno Soares hateten, programa ida ne’e SEFOPE liu-husi Diresaun Nasionál Empregu Exteriór, servisu hamutuk hó parsériu internasionál sira hanesan, WDPTL, PLF, dezenvolve progrma ne’e, atu hasa’e kandidatu traballadór sira nia koñesimentu antes tama ba servisu iha Austrália.
Diretór ne’e agradese ba Governu Austrália ne’ebé fó apoiu teknika no finanseira ba programa ida ne’e hodi implementa, espera kooperasaun ne’e sei lahotu, hodi haboot liu-tán programa ida ne’e iha futuru, tánbá kandidatura traballadór ba Asutrália iha sistema work ready pool hamutuk rihun-sanulu-resin-lima.
“Agradese mós ba Sentru Formasaun Klares Salele, Sentru Formasaun CDC Baucau, no Sentru Nasionál Empregu Formasaun Profisionál Tibar ne’ebé koopera hodi oferese fatin, atú kapasita ita nia joven Timor-oan sira nia kapasidade hó di’ak liu-tán antes ba servisu iha Austrália,” nia hateten liu husi Komunikadu ne’ebé TIMOROMAN.COM asesu ohin.
Ikus liu hato’o parabéns ba formandu na’in tolu-nulu-resin-sia ne’ebé dedika sira nia aan hodi kompleta ona formasaun ida ne’e tuir tempu ne’ebé determina, maibé husu nafatin atu kuidadu saude no labele komete iha violensia. (Gracio)
