Sei Eleitu, LUGU Sei Hadi’a Ekonomia No Justisa Iha TL
MANUFAHI (Timoroman) – Kandidatu Prezidente da Repúblika (PR) númeru sorteiu 5, José Luis Guterres LUGU promete, bainhira hetan fiar hosi povu Timor-Leste, nia sei hadi’a seitór ekonomia no justisa iha rai laran.
LUGU hato’o lia hirak ne’e, iha komprimisiu polítiku hó populasaun iha kampu futeból Raiubu, Suku Letefoho, Postu Administrativu Same, Munisípiu Manufahi, Domingo (05/03).
“Ita presiza hadia seitór tribunais. Tribunais sira presiza independente. Labele depende ba partidu polítikus ida. No labele depende ba lideransa polítikus. Maibé, depende ba lei no sira ninia konsiensia,” hatete LUGU.
Nia dehan, bainhira atu nomeia Prezidente Tribunal Rekursu no mós Prokuradór Jerál Repúblika, presiza haree didi’ak. Nune’e, bele hili ema ne’ebé aten brani no iha kapasidade duni. Atu nune’e, bele implementa lei ho loloos.
Aleinde ne’e, LUGU mós informa katak, ohin loron Timor-Leste infrenta hela situasaun ekonómia ne’ebé mak difisil tebes. Tanba, sei iha dezempregu barak iha nasaun ida ne’e.
“Ida ne’e, programa ida global. Tenke deskuti ho Governu. Saida loos mak atu halo par povu Timor-Leste nia vida bele hadi’a lalais. Sei lae, aban bainrua jerasaun foun sei lahetan empregu,” nia tenik.
Iha ema balun, tuir LUGU, kestiona katak kria kreditu ne’e sira la selu. Maibé, nia konfirma ho banku ultramarinu sira dehan iha 2006 no 2007, iha problemas mak Timor-oan la selu fali empretismu ne’ebé sira foti hosi banku.
LUGU mós espera, Timor-oan sira sei selu fali kreditu ne’ebé sira foti. Ho nune’e, labele depende ba ema estranjeiru mak habokur fundu mina rai. Maibé, presiza Timor-oan mak habokur rasik fundu mina rai. “Nune’e, bele hetan 8% kada tinan di’ak ona ba Estadu. Tanba, bele kria rasik kampu servisu ba Timor-oan no mós indústria rasik,” nia haklaken.
Lugu dehan, sei la halo polítika ida hanean ne’e, povu sei susar. Tan ne’e, presiza buka alternativas ba seitór ekonomia Timor. Para labele depende de’it ba mina rai.
“Ba seitór ekonomia iha alternativu barak, hanesan área turizmu, agrikultura, veternaria no peskas. Nune’e, bele hadi’a ekonómia Timor-Leste nian, atu labele depende demais ba fundu mina rai,” nia esplika. (jax)
