3 de Marsu, Loron Espesiál Veteranus
DILI (Timoroman) – Governu Timor-Leste, rekoñese loron 3 de Marsu nu’udar loron ida, ne’ebé espesiál ba Veteranus Timor-Leste tomak.
“Governu halo ona resoluzaun ida atu atribui loron espesial 3 de Marsu ba ita nia veteranus tomak. Liuliu, ba sira ne’ebé mak fó sira-nia isin no ran ba independénsia ba rai ida ne’e,” hateren Primeiru Ministru (PM) interinu, Dionisio Babo ba jornalista, Kinta (02/03) iha Centru Convensaun Dili (CCD).
Dionisio dehan, ida ne’e hanesan rekoñesementu ida ba veteranus nia esforsu tomak. “Ita oan sira ne’e, tenke orgullu hodi la’o tuir sira nia ain fatin. Atu nune’e, bele dezenvolve diak liu-tan ita nia nasaun,” haktuir PM interinu ne’e.
PN Kongratula
Parlamentu Nasionál (PN), fó sira ninia kongratulasaun ba loron nasionál veteranus ne’ebé monu iha 3 Marsu, ne’ebé Estadu Timor-Leste, dedika ba veteranus sira.
Membru deputadu Bankada CNRT, Arão Noe de Jesus hatete, loron nasionál ba veteranus ne’e, hanesan loron espesiál ne’ebé Estadu Timor-Leste dedika no dignifika kontribuisaun veteranus sira nian, iha luta naruk hodi restaura independénsia Timor-Leste.
“Tan ne’e, loron ida ne’e nia signifikante bo’ot tebes. Aproveita momentu ida ne’e atu kongratula veteranus sira hotu-hotu, ne’ebé luta ba defende restaura ita ninia independénsia,” dehan deputadu Arão Noe, Kinta (02/03) iha PN, Dili.
Reprezentante povu ne’e mós husu ba veteranus sira atu dignifika nafatin loron espesial ida ne’e hamutuk hó povu tomak hodi fó onra, nune’e bele dignifika veteranus sira nia kontribuisaun.
Deputadu ne’e mós husu ba veteranus sira atu fó kontribuisaun ba dezenvolvimentu nasionál no garante estabilidade. Ho nune’e, dezenvolvimentu nasionál ne’ebé durante ne’e sai mehi ba povu, bele atinje.
“Atu liberta povu, veteranus sira tenke unidus. Fó liman ba malu. Atu nune’e, bele dezenvolve rai ida ne’e, hodi atinje mehi ne’ebé seidauk konklui ba povu nia moris di’ak,” nia sujere.
Iha fatin hanesan, membru deputadu hosi bankada Fretililn, David Dias “Mandati” Ximenes hatete, tansá Timor-Leste luta ba rezisténsia nasionál. Tanba mai hosi hanoin ida atu liberta nasaun ida ne’e. Ho nune’e bele liberta fali povu.
“Kontribuisaun hosi veteranus nian, ba dezenvolvimentu nasionál mós maka’as nafatin, liuhosi projetu sira. Liuliu, projetu eletrisidade nian,” Mandati hateten.
Iha sorin seluk, Prezidenti Konsellu Veteranus Munisípiu Lautem (PCVL), Faustino dos Santos ‘Renan Selak’ hateten, loloos tenki vesteza ho loron 3 de Marsu ne’e. Maibé, iha loron 18 seidauk iha baze legal.
“Ho ida mak ami la vesteza loron ida ne’e. Tanba ikus mai, hau rona legaliza tiha ona loron 3 de Marsu sai loron veteranus. Ne’ebé ho loron ida ne’e ha’u haksolok no fiar katak tinan oin mai sei vesteza loron refere,” dehan Renan Selak ba Timoroman, hafoin partisipa kampañia kandidatura númeru 8, Antonio da Conceição ‘Kalohan’ iha Lospalos, Sesta (03/03).
Eis sekretariu área Ponta Leste ne’e haktuir, loron ida ne’e sai importante ba Veteranus hotu-hotu. Ho nune’e, nia parte husu ba veteranus hotu-hotu atu buka malu hamutuk nafatin. (sal/jax)
