Dom Virgílio: TL Presiza PR Ho Figura Unidade
DILI (Timoroman) – Amu-Bispu Dioseze Dili, Dom Virgílio do Carmo da Silva hatete, Timor-Leste presiza Prezidente da Repúblika (PR) ho figura unidade. Tanba tuir Dom Virgilio, unidade no páz iha Timor Leste sei frazil hela.
Dom Virgílio do Carmo da Silva hato’o asuntus ne’e, bainhira simu kandidatu PR Independente númeru 5, José Luís Guterres ‘Lugu’ iha Rezidénsia Episkopal, Lecidere, Sesta (03/02).
Ko’alia nu’udar Bispo, nia dehan, presiza haree ba figura kandidatu. No mós kriteria saida de’it mak kandidatu PR sira presiza, atu halo ba povu no nasaun ida ne’e.
“Ba ha’u, iha hanoin rua de’it. Bainhira ko’alia konaba ita nia kriteria saida de’it mak presiza, ita bele haree iha ita nia kandidatu sira. Ohin loron ita presiza Prezidente ida ne’ebé tenkeser, sai figura unidade ba iha nasaun ida ne’e,” dehan Dom Virgílio.
Lideransa uma kreda Dioseze Dili ne’e dehan, PR tenkeser sai sentru unidade ba ema hotu. Nune’e, tenke hakuak ema kí’ik ka bo’ot, katuas no ferik, matenek ka la matenek, no mós ema ne’ebé hela iha sidade ka foho.
“Tansá mak ha’u preokupa ho ida ne’e. Tanba, Timor ne’e nasaun ida foin mak atu hamriik. Unidade no páz iha ita nia rain ne’e frazil hela. Tan ne’e, ita presiza ema ida ho figura ida ne’ebé hatene ka’er, hatene rona no rekolla ema hotu ninia preokupasaun,” Dom Virgílio hateten.
Bispo ne’e dehan, Timor-Leste hanesan nasaun foun ida. Tanba ne’e, presiza ukun-nain ida ne’ebé iha vizaun di’ak. Liuliu atu povu bele moris hakmatek, bainhira iha nesessidade bázikas ne’ebé sufisiente no mós edukasaun tenke sufisiente ba ema hotu.
“Ita iha juventude barak. Iha universitáriu barak, ne’ebé tinan-tinan kontinua gradua ho númeru sa’e. Bainhira ita nia graduadu sira remata eskola, sira hotu bele servisu. Ho ida ne’e, ita hotu bele hakmatek, familia no aldeia hakmatek, nasaun mós sei hakmatek,” lider uma kreda ne’e dehan tan.
Iha okaziaun ne’e, kandidatu Prezidente Repúblika, José Luis Guterres ‘ Lugu’ hatete objetivu hasoru malu ho Amu-Bispu Dioseze Dili ne’e atu informa kona-ba vizaun ne’ebé mak nia iha ba eleisoens 2017 nian.
Kandidatura PR ne’e dehan, preokupasaun hosi Amu-Bispu mak relasaun ho joventude. Tanba, oras ne’e daudauk numeru dezempregu sa’e maka’as.
“Ha’u hanoin, bu’at ne’ebé Amu-Bispo ko’alia hakarak kria empregu ba joventude, atu kria mós fasilidades ne’ebé di’ak ba ita nia populasaun, familia tomak iha ita nia rai laran,” dehan ‘Lugu’.
‘Lugu’ mós hakarak hato’o ninia ideias ba Amu-Bispu Dom Virgílio do Carmo da Silva. Tanba, tuir nia, tama ona ba tempu kampañia eleitorál. Ne’e duni presiza halo reflesaun ba sira nia aan no mós ba sosiedade.
“Enkontru hó amu Bispo di’ak. Tanba, amu Bispu mós iha hanoin sobre problemas ne’ebé sosiedade iha,” hateten eis Vise Primeiru Ministru ne’e.
Aleinde ne’e, ‘Lugu’ informa katak iha ninia kampañia abertura nia sei halo dialogu interativu ho populasaun iha zona Becora. “Ho nune’e, ha’u bele rona saida mak sai nu’udar populasaun preokupasaun durante ne’e, ‘Lugu’ dehan tan.
Antes abertura ninia kampañia, kandidatu PR José Luís Guterres ‘Lugu’ halo mós misa agradesimentu iha Kapela Semináriu, Balide, Dili. (anu)
