Xoke Mate Ema, Xofér Entrega Aan
DILI (Timoroman) – Xofér Taxi kinur, ne’ebé iha Segunda (20/02) madrugada xoke mate feto ida, iha área Embaixada Xinan nia oin, entrega aan ba Komando PNTL, Munisípiu Baucau.
“Ami nia servisu hamutuk ho parte intelejensia no autoridade sira, konsege identifika duni suspeitu iha Munisípiu Baucau. Agora, suspeitu hetan Termu Identidade Rezidénsia (TIR) hodi hein prosesu,” afirma Segundu Komandante PNTL Munisípiu Dili, Superintendente Asistente Euclides Belo ba jornalista, Kinta (02/03) iha ninia Komando PNTL Munisípiu Dili.
Durante ne’e, tuir Euclides, PNTL buka duni suspeitu. Maibé, suspeitu halai ba munisípiu. Maski nune’e, ninia parte konsege identifika taxi kinur ne’ebé nia númeru matrikula 35.534 TL. Taxi ne’e, agora para hela iha Komando PNTL Munisípiu Dili.
“Tanba ami rona informasaun katak suspeitu halai ba Baucau, ami halo kontaktu kedas ho PNTL Munisípiu Baucau. Bainhira suspeitu rona polísia buka hela nian, nia mós entrega aan iha Komando PNTL Munisípiu Baucau, faoin lalais ne’e,” Euclides esplika.
Tuir Euclides, suspeitu ne’e mós hatudu hahalok ne’ebé di’ak. Maski nia sala, maibé koopera nafatin ho parte polísia. “Ami halo hela prosesu ba kazu ida ne’e. Bainhira prosesu remata, ami sei entrega ba Ministériu Públiku para lori ba tribunál. Hosi tribunál mak bele hasai karta kapturasaun mai ami atu halo kapturasaun ba suspeitu ne’e,” Euclides esplika.
Hatán ba perguntas, tansá polísia lahatama suspeitu ba sela. Euclides dehan, kazu ne’e liu tiha ona semana hirak nia laran. “Ami labele detein suspeitu bainhira kazu liu ona semana. Lei mak hakerek hanesan ne’e. So tribunál hasai karta kapturasaun mak ami bele kaptura suspeitu ne’e,” nia esplika tan. (anu)
