Organizasaun Movimentu Alerta Kamponezes Hakmatek
TIMOROMAN.COM-Atu garantia estabilidade no soberania povu, dirijente Kdadalak Sulimutuk Institute (KSI) hamutuk ho organizasaun movimentu Uniaun Agrikultura Ermera (UNAER) no Movimentu Popular Reforma Agraria-Liquiça (MPRA-L) alerta ba kamponezes tomak atu hakmatek iha idak-idak nia fatin hodi kontinua hala’o servisu nu’udar to’os na’in.
Desizaun Prezidente da Republika, Francisco Guterres Lu-Olo hodi desolve Parlamentu Nasional no disidi hakat ba eleisaun antesipada nu’udar alternativu ida hodi solusiona impesa politika ne’ebé akontese iha rai laran. Ne’e duni, husu ba to’os na’in sira atu hakmatek hodi kontribui ba pás no estabilidade.
Nu’udar organizasaun movimentu, tinan barak ona UNAER, MPRA no KSI hala’o servisu besik liu ba to’os na’in sira, liu-liu iha Munisipiu Ermera, Liqueça, Manufahi, Ainaro no Suai. Tan ne’e, organizasaun hirak ne’e iha responsabilidade moral hodi alerta ba to’os na’in sira atu hakmatek no kontinua hala’o servisu iha idak-idak nia to’os ho natar, tanba iha prosesu dezenvolvimentu nasaun presiza mós to’os na’in sira nia partisipasaun.
“Hanesan to’os na’in importante kamponezes sira kontinua hala’o servisu, labele monu ba manobra politika husi ukun na’in sira. Husik politika na’in sira hala’o sira nia politika, ita bo’ot sira hein loron ba eleisaun antesipada hafoin idak-idak ba vota,” deklara Jenito Santana iha knua KSI, Segunda, (12/02).
Santana haktuir, KSI hamutuk ho orgazasaun movimentu sira prontu atu kontribui no servisu hamutuk Governu se de’it mak atu ukun, maibé importante maka hamosu programa ida ne’ebé benefisia to’os na’in sira, hakbesik merkadu ba produtores sira no dezenvolve di’ak liu tan setor agrikultura, tanba maioria povu Timor-Leste moris hanesan to’os na’in.
Entertantu Prezidente UNAER, Alberto Martins Guterres apelu ba membru komite baze tomak iha Munisipiu Ermera kontinua hametin pás no estabilidade iha idak-idak nia baze, nune’e bele kontribui ba prosesu konstrusaun estadu.
“UNAER nu’udar organizasaun masa ne’ebé halibur to’os na’in sira hodi luta defende direitu kamponezes sira atu asesu ba rai, la’os ba partidu politiku, ne’e duni iha eleisaun antesipada UNAER sei fó liberdade ba nia membru tomak atu hili tuir idak-idak nia konsensia, tanba membru UNAER kompostu husi multipartidaria,” deklara Alberto.
Antes ne’e, iha sorumutu entre reprezentante to’os na’in sira ho Prezidente da Republika, Francisco Guterres Lu-olo (Jullu tinan kotuk) ne’ebé lidera husi Veterana, Madalena Maria Bidau Soares (kasian) husu ba Prezidente da Republika atu hala’o dialogu ho lideransa partidu politika sira hodi solusiona impase politika ne’ebé akontese iha rai laran.
“Hanesan to’os na’in ami preokupa tebes ho situasaun politika iha rai laran, ne’e duni ami husu ba ukun na’in sira ho fuan bo’ot fó liman ba malu dezenvolve rai ida ne’e. Ami mós hakarak moris iha situasaun pás no estabilidade, nune’e bele iha espasu ba ami hodi hala’o servisu iha to’os no natar para hadia ami nia vida moris,” deklara Kasian iha momentu ne’ebá.
Deklarasaun hanesan hato’o mós husi Prezidente Autoridade Munisipiu Manufahi, Carlito P. de Araujo iha momentu hala’o abertura ba programa sosializasaun politika Reforma Agraria ne’ebé organiza husi KSI iha salaun inkontru Munisipiu Manufahi foin lalais.
“Husu ba na’in Xefi Suku sira atu organiza populasaun sira tu’ur hakmatek, hodi kontinua hala’o servisu nu’udar to’os na’in, atu nune’e bele hadi’a ita nia vida ekonomia,” informa Prezidente Autoridade ne’e.
Nia haktuir, importante tebes povu tomak tenke kontribui ba estabilidade hodi kontinua hein formasaun ba governu foun no espera katak situasaun hirak ne’e hotu bele utrapasa ho lalais.(sal)
