Alkatiri Lakohi Ukun Iha Nakukun Laran
TIMOROMAN.COM-Primeiru Ministru (PM), Mari Alkatiri husu tenke hala’o uluk auditoria iha Rejiaun Administrativa Espesial Oe-cusse Ambeno (RAEOA), inklui kada Ministériu hotu tanba lakohi atu ukun Governu iha nakukun.
Primeiru Ministru, Mari Alkatiri hato’o deklarasaun ne’e bazeia ba karta pedidu ne’ebé nia parte haruka ona ba Tribunál Câmara Contas atu hahú hala’o uluk auditoria husi Rejiaun Administrativa Espesial Oe-cusse Ambenu (RAEOA) no Zona Espesial Ekonomia Sosial Merkadu (ZEESM).
“Ita ko’alia auditoria dehan, tenki hala’o uluk iha Oe-cusse, depois ita husu atu hala’o uluk iha Oe-cusse dehan fali atu halo persegisaun. Se ha’u la halo auditoria, ha’u ukun iha nakukun de’it,” dehan Mari Alkatiri iha nia diskursu hafoin sai oradór iha UNTL hodi ko’alia kona ba “Sidadaun Responsável” ne’ebé hala’o iha kampus UNTL, Segunda, (12/02).
Mari haktuir, objetivu halo auditoria ba instituisaun hotu la’os ho intensaun atu lori ema ba kastigu iha kadeia, maibé tanba lakohi atu ukun iha nakukun laran, ne’e duni presiza hatene saida maka sala no saida maka loos.
Iha parte seluk, Prezidente Tribunal Rekursu, Deolindo dos Santos rekoñese Tribunal de kontas simu ona pedidu husi Xefi de Governu atu hala’o audotoriu ba projeitu sira.
“ Tribunal de Kontas simu ona pedidu husi Primeiru Ministru no iha pedidu ne’e, Primeiru Ministru rasik husu Tribunal de Kontas atu hala’o uluk auditoria ba projeitu ZEEMS, ne’e duni Tribunal de Kontas sei ezerse nian funsaun hodi tau iha planu para atu hare posibilidade ne’ebé iha hodi hala’o auditoria,” dehan Prezidente Tribunal Rekursu, Deolindo dos Santos ba Jornalista, hafoin remata enkotru ho Prezidente da Republika, Francisco Guterres Lu Olo iha Palasiu Prezidensial Nicolau Lobato, Bairro Pite, Segunda, (12/02).
Hatan kona ba deklarasaun Primeiru Ministru ne’ebé husu hala’o mós auditoria ba iha Ministeriu Finansas no Turismu, maibé Prezidente Tribunal Rekursu responde, pedidu ne’ebé nia parte simu husi Xefi Governu husu ba Tribunal Kamara de Kontas atu hala’o de’it auditoria ba projeitu ZEEMS, maibé ba Ministeriu seluk la mensiona iha pedidu refere.
“Tribunal Rekursu sei hala’o tuir saida maka iha pedidu nia laran no lakohi halo espekusaun oin-oin husi pedidu ne’e rasik,” esplika Deolindo. (jax/anu)
