PD Desidi Avansa Mesak
TIMOROMAN.COM-Maski desidi sei la’o mesak iha Eleisaun Antesipada, maibé koligasaun Partidu Demokratiku (PD) ho Partidu Frente Revolusionariu Timor-Leste Independente (FRETILIN) iha Governasaun kontinua metin no mai ho materia kampaña ida de’it.
“Prezidente PD fó sai ona iha Facebook katak, pozisaun PD nian sei la’o mesak iha eleisaun antesipada, maibé koligasaun iha Governu mantein nafatin ho FRETILIN,” deklara Xefi Bankada PD, Maria Tereza ba iha Parlamentu Nasional (PN), Segunda, (12/02).
Desizaun PD prefere la’o mesak iha eleisaun antesipada, maibe material ba kampaña ida de’it. “Iha kampaña PD ho FRETILIN sei la’o ketak-ketak, maibé material kampaña sei foka liu ba programa VII Governu no Planu Estratejiku Dezenvolvimentu Nasional (PEDN) ne’ebé durante ne’e hala’o ona, ne’e duni hein katak programa ne’e tenke to’o nia rohan,” tenik Tereza.
Maski nune’e, desizaun bo’ot liu sei desidi iha konferensia PD, tanba liu konferensia hafoin bele foti desizaun ba pozisaun PD nian iha eleisaun antesipada.Xefi Bankada PD iha uma fukun konsidera koligasaun partidu tolu CNRT, PLP no KHUNTO sei la fó ameasa ba sira, tanba desizaun hotu-hotu iha povu nia liman.
“Ita bele ko’alia no halo buat hotu-hotu, maibé durante fulan neen (6) povu hatene, hare ho matan no rona ho tilun, kona ba lala’ok politika husi koligasaun AMP nian,” esklarese Tereza.
Povu hatene partidu ida ne’ebé mak tane as interese estadu no povu, ne’e duni sira sei hili partidu ida ne’ebé iha fuan no sente duni sakrifisiu povu nian.(sal)
