Estraga Uma Komunidade 36, PM Rui: Tenke Foti Medidas
DILI (Timoroman) – Primeiru Ministru (PM), Rui Maria Araújo husu ba parte seguransa no mós justisa, atu foti medidas ba konfrontus ne’ebé akoñtese iha Aldeia Terra Santa, Raikotu, Suku Comoro, Sesta (03/03) liubá.
PM Rui hatete ba jornalista, Sábadu (04/03) liuhosi konferensia da imprensa, iha Aeoroportu Internasionál Nicolau Lobato, hafoin fila hosi Nova Zelândia.
“Baihira uza ona violensia atu halo provokasaun, órgaun seguransa tenke foti medidas, hamutuk ho operadór justisa seluk. Tanba, kazu ida ne’e iha ligasaun ho krime,” afirma PM Rui.
Tuir PM, públiku hatene katak eleisaun hanesan festa demokrasia. Ne’ebé, bainhira festa ne’e hala’o hodi haksolok. La’ós atu ba sadik malu no tuda malu.
“Ha’u hakarak fó apelu ba populasaun tomak, atu tenke dignifika importansia prosesu demokratiku, ne’ebé ita hala’o. Ita nia luta atu liberta povu, tenke liuhosi prosesu ida ne’ebé mak dignu. Tan ne’e, ha’u husu ba populasaun tomak, atu tuir kampaiña ho dignidade,” PM informa.
Entretantu, PM dehan, PNTL nu’udar institusaun ne’ebé mak iha mandatu legal tuir konstituisaun haruka, tenke halo atuasaun bainhira akoñtese konflitu ruma. PNTL, tuir PM, sei foti medidas tuir lei ne’ebé defini tiha ona.
“Ita la persiza uza violensia, hodi tuda malu no provoka. Tenke kumpriende ema seluk, atu vota tuir ita ou la tuir. Ida ne’e, ha’u husu ba apoiantes hosi kandidatu sira, ne’ebé oras ne’e dadaun halo hela kampaiña,” PM haktuir.
PM mós subliña katak atu partisipa atividade kampaiña eleitoral tenke kalma, hatudu dignidade no maturidade nu’udar sidadaun Timor-Leste.
“Bainhira halo vizita iha nasoens ne’ebé mak belun ho Timor-Leste, nasoens hirak ne’e iha admirasaun boot. Tanba, TL hatudu ona hosi 1999 to’o agora maturidade, adopta valores demokratiku no mós adopta diferensia opiniaun,” nia hateten.
PM Rui mós husu ba joventude atu halo komporta diak. Nune’e mós ba kandidatu hosi apoiantes hotu-hotu, atu halo komporta di’ak iha prosesu kampaiña, ne’ebé sei remata iha dia 16 Marsu 2017.
“Ha’u husu mós ba lideransa, kordenadores ou responsavel hosi kampaiña eleitorál, atu apela ba sira-nia apoiantes hotu, atu labele mosu komportamentu ka atetude ne’ebé mak ladi’ak, hodi sadik malu ho apoiantes sira seluk, hodi mosu violensia,” PM afirma.
Lamentasaun
Iha sorin seluk, Xefe Suku Comoro, Eurico da Costa lamenta ho atitude ne’ebé deskonfia, halo hosi militante Fretilin iha Sesta (03/03) lokraik iha Aldeia Terra Santa, Raikotu, Comoro ne’ebé rezulta komunidade nia uma 36 iha área refere, hetan estragus.
“Ha’u hatoo ha’u nia lamentasaun, ba hahalok ne’ebé deskonfia halo hosi militantes Fretilin ba ha’u nia komunidade sira iha Aldeia Terra Santa, Raikotu, Comoro ne’ebé rezulta uma hamutuk 36, karreta 2, motor 3 hetan estragus no mós joven na’in 2 hertan kanek,” dehan Eurico ba jornalista iha konferensia da imprensa, Sábadu (04/03) hamutuk ho Xefe Aldeia Terra Santa, Esperansa da Jesus no mós komunidade Aldeia refere.
Tuir Eurico, akoñtesementu ne’e akoñtese maizumenus tuku 05.30 lorokraik, bainhira apoiantes hosi kandidatu Prezidente da Repúblika númeru 2, fila hosi kampaiña dahuluk iha Gleno, Munisípiu Ermera.
“Ha’u deskonfia, Grupu Arte Marsiais (GAM) iha pasadu ninian, ne’ebé lori fali no aproveita atividade kampaiña kandidatu Prezidente da Repúblika,” Eurico dehan.
Xefe Suku ne’e mós sente triste ho atitude ida ne’e. Tanba, militantes Fretilin estraga fali komunidade nia uma no mós sasán seluk. Nia dehan, PNTL kaptura ona komunidade ida ne’ebé hela besik iha Aldeia Terra Santa.
Iha fatin hanesan, Xefe Aldeia Terra Santa, Esperanca de Jesus mós hatoo preokupasaun hosi komunidade aldeia refere ba kandidatura Prezidente Repúblika númeru 2, Francisco Guterres Lú-Olo.
“Ha’u husu ba kandidatura Prezidente da Repúblika Francisco Guterres Lú-Olo, atu toma responsabilidade ba asaun anarkizmu hosi ninia apoiantes sira, ne’ebé uza atributu partidu hodi estraga komunidade nia uma, karreta ho motor,” hatete Esperansa ho tanis.
Xefe aldeia ne’e mós husu ba parte seguransa, liuliu PNTL atu bele asegura ho di’ak seguransa durante kampaiña hosi kandidatu Prezidente da Repúblika sira. “Sei laiha prevensaun ba konfrontus hanesan ida ne’e, povu mak sai vitima nafatin,” nia afirma.
Iha parte seluk, Komandante Operasaun PNTL, Superintendente Xefe Henrique da Costa rekoñese problema ne’ebé akontese iha área Raikotu, hodi rezulta komunidade nia uma 36 hetan estragus no mós sasan seluk.
“Ami kaptura tiha ona ema na’in ida. Agora daudauk iha hela sela eskuadra PNTL Dom Aleixo nian, hodi halo prosesu investigasaun, para bele hatene motivu hosi problema ne’e. Liuliu, autór loloos mak se loos,” hateten Henrique.
Observasaun ne’ebé Timoroman halo iha fatin akoñtesemntu hatudu katak, uma 36 hosi komunidade iha área refere hetan estragus hotu. Inklui karreta 2 no mós motor 3.
To’o Domingo (05/03) lorokraik, membru PNTL halo hela movimentu iha fatin akoñtesementu, hodi fó seguransa no mós antisipa para akoñtesementu hanesan labele akontese tan. (anu)
