PR Taur, Defende Militar Obrigatoriu
BAUCAU (Timoroman) – Prezidente da Repúblika (PR) Taur Matan Ruak, to’o agora, defende nafatin sistema militar obrigatoriu. Tan ne’e, PR propoin ba Estadu liuhosi Governu atu obriga joven sira ne’ebe maka tinan 18 ba leten, tenke tama hotu tropa.
Tuir PR Taur, nia parte defende militar orbrigatoriu bainhira sei iha kargu nu’udar Xefi Estadu Maior Jeneral das F-FDTL. “Sai militar, ita aprende buat barak. Hau defende servisu militar ne’e obrigatoriu. Katak, joven hotuhotu tinan to’o ona 18 tenke tama hotu ba tropa. Hanoin ida ne’e, ha’u sei iha F-FDTL,” bainhira halo asina plaka ba fatin Kaixa Klandestina Vitimor, iha Suku Gariuai, Posto Administrasaun Baucau Vila, Munisípiu Baucau, Sesta (03/03).
PR hatete, ate agora to’o nia kargu nu’udar Prezidente da Repúblika mós, nia sei defende nafatin hanoin ida ne’e. Nia rasik, PR Taur dehan, aprezenta ona ba Governu dala rua ou dala tolu. Liuliu ba Ministru Defesa no Seguransa para bele prosesu buat hirak ne’e. Maibe, to’o agora, desizaun laiha.
Frente Klandestina
Iha okaziaun ne’e mós, Prezidente da Repúblika, Taur Matan Ruak afirma katak Estadu liuhosi Governu Timor-Leste, sei la haluha ninia ema sira ne’ebé uluk sakrifika sira-nia an ba nasaun Timor-Leste.
“Ita nia Estadu liuhosi Governu sei la haluha imi nia terus no imi nia kontribuisaun, ne’ebé maka imi halo ona ba rai ida ne’e. Maibé, buat hirak ne’e mós tenke tuir nia prosesu hotu. Tan ne’e, loron ida sei to’o,” hatán PR Taur kona-ba preokupasaun hosi Lorenço Carlos Belo ‘Moruk’ membru frente klandestina ida hosi Suku Gariuai.
Tuir Xefe Estadu ne’e, ohin loron Governu seidauk bele responde ezijensia hirak ne’e. Maibé, PR Taur dehan, iha loron ruma Governu sei responde. Tanba, Governu sei la taka matan ba nia povu.
Lorenço Carlos Belo, ne’ebé uluk luta iha frente klandestina, sente Estadu no mós Governu Timor-Leste abandona tiha sira.
“Ha’u nia razaun katak durante ne’e frente diplomasia no frente armada, iha ona lei ida hodi proteje sira. Maibé, ba ami sira hosi frente klandestina, to’o ohin loron la iha lei ida atu proteje,” tenik Lorenço.
Tuir ‘Moruk’ bainhira uluk luta ba independénsia, frente tolu maka sempre fó apoiu ba malu, hodi luta hasoru invazor. Frente diplomasia, frente armada no frente klandestina.
“Ohin loron, frenti rua mak Governu produs ona lei hodi proteje sira. Maibé, durante tinan 15 ona Timor ukun an, ami sira hosi frente klandestina, seidauk iha lei ida atu proteje ami,” nia dehan.
Iha fatin hanesan, Xefe Suku Gariuai, Arlindo Marçal husu ba PR kona-ba preokupasaun joven sira iha suku refere durante tempu ukun an nia laran. Tanba, laiha joven ida hosi suku ne’e mak sai membru F-FDTL.
“Agora tempu ukun an nia laran, lori tristeza boot mai iha povu Suku Gariuai. Tanba, la iha joven ida mak durante ne’e liu rekrutamentu F-FDTL. Tan ne’e, ami husu ba Prezidenti da Repúblika, atu haree ho preokupasaun hirak ne’e,” dehan Arlindo. (viq)
