‘Kalohan’ Sei Sai Ibun No Lian Ba Jerasaun Foun
BAUCAU (Timoroman) – Kandidatu Prezidente da Repúblika, António da Conceição ‘Kalohan’ promete, sei sai ibun no lian ba jerasaun foun, bainhira nia asume knaar nu’udar Prezidente da Repúblika.
Kalohan hatete asuntu ne’e, Sábadu (04/03) iha Jináziu Munisípiu Baucau, bainhira haree partispasaun iha nia loron kampaiña prezidensial ba daruak ne’e, maioria partisipa hosi jerasaun foun sira.
“Knaar ida Prezidente da Repúblika nian, atu sai defensór ou advogadu ba povu hodi ko’alia reprezenta povu. Ha’u observa no haree hosi Lospalos mai to’o Baucau, ha’u sei haree nafatin partisipasaun bo’ot liu ne’e, hosi jerasaun foun sira,” nia dehan.
Ida ne’e signifika katak jerasaun foun sira mos hakarak hatudu sira nia espetativa ho komprimisiu ne’ebé mak sira halo hakarak atu fo apoiu ba ha’u.
Tan ne’e, tuir Kalohan, nia sei sai ibun no lian ba jerasaun foun sira mos ba povu. Tanba iha nasaun ida ne’e, nia hatete, laiha oportunidade ba povu atu ko’alia, kona-ba preokupasaun, hanesan falta bee moos, eletrisidade laiha, eskola laiha kondisaun. “Ne’ebé hanesan Prezidente da Repúblika, nia tenke haree buat hirak ne’e,” Kalohan dehan iha entrevista ho jornalista, hafoin halo nia kampaiña ba loron daruak ne’e.
Observasaun ne’ebé Kalohan rasik hatete katak, iha ninia kampaiña ne’ebé inisiu hosi Lospalos to’o Baucau, nia haree situasaun jerál la’o ho hakmatek no disiplina. “Ida ne’e nota katak iha sosiedade ida hakarak atu haree iha mudansa duni,” nia hatete tan.
Aliende ne’e, kandidatu ho númeru sorteiu 8 ne’e dehan, nia sei promove mós dialogu institusional Estadu wainhira eleitu. “Ida ne’e, kondisaun ida nesesariu tebes atu instituisaun de Estadu bele iha separasaun de poder. Maibé, labele reklama nia direitu no nia kompetensia de’it. Prezidente tenke sai promotór ba ida ne’e,” Kalohan afirma.
Iha fatin hanesan, Primeiru Vise Prezidente Partidu Klibur Haburas Unidade Nasional Timor-Oan (KHUNTO), António de Sousa Verdial hatete nia parte sente haksolok tebe-tebes, tanba haree jovem hosi Partidu KHUNTO ho joventude PD Munisípiu Baucau nian, haforsa disiplina durante kampaíña.
“Ha’u husu kolaborasaun no kooperasaun nafatin, entre Partidu KHUNTO no PD. Atu ita boot sira kontinua tama hamutuk iha kooperasaun, kolaborasaun no koordenasaun. Ho nune’e bele lori ita nia kandidatu Kalohan, ba iha Palasiu Prezidente Aitarak-Laran,” dehan Vise Prezidente KHUNTO nee. (sal)
