Aumenta Suku, La Difikulta Servisu OPS
TIMOROMAN.COM- Relasiona ho hamosu suku foun 10, soma hamutuk suku iha teritoriu timor laran 452, la defikulta servisu Ofisial Polisia Suku (OPS) maiske oras ne’e dadaun sira infrenta falta motorizada.
Tuir Komandante Jeral (Komjer) PNTL, Komisariú Julio da Costa Hornay, afirma OPS ne’ebé preokupa servisu tan de’it falta transporte ne’e loos.Maibe, kona ba suku foun iha Munisipiu Dili Komadante Munisipiu Dili mak bele desloka nia membru PNTL ida ba iha suku foun ne’ebé foin lalais aumenta ne’e.
“Ha’u hanoin OPS desloka ba iha suku foun sira preokupa mak transporte de’it tanba suku foun, entaun fiskal ne’e liu tiha tinan oin mak bele fó apoiu motorizada 10 ba OPS ne’eb’e desloka ba suku foun, maibe la difikulta sira nia servisu,” dehan Komjer Julio ba Jornalista, hafoin hasoru Prezidente Republika (PR), Francisco Guterres ‘Lú-Olo’, iha Palasiú Prezidensial Nicolau Lobato Bairru-Pite, foin lalais ne’e.
Ulun bóot PNTL ne’e hanoin OPS kolokadu hotu ona ba suku iha Timor laran tomak 442 hodi aumenta tán 10 hamutuk suku iha teritoriu Timor 452 suku.
Hanesan Munisipiu Baucau foin lalais aumenta tan suku foun maka Komandu PNTL Baucau rasik tenke koloka nia membru balun servisu hamutuk hó Xefe Suku foun ne’ebé mak servisu hó komunidade, entaun OPS tenke koopera diak hó Xefe suku foun.
Komjer PNTL relata, kona ba kestaun transporte ba OPS foun ne’ebé mak desloka ba suku foun ne’e hein orasamentu tinan oin nian mak bele hatama ba iha fiskal nian, atu nune’e tinan bele ona apoiu transporte 1o ba OPS ne’ebé mak seidauk hetan.
“Hau husu ba OPS foun ne’e atu bele koopera di’ak hó Komandu PNTL Munisipiu inklui Polisia eskudra, atu nune’e bele fó apoiu nafatin transporte hodi bele koopera di’ak nafatin hó komunidade inklui autoridade lokal,” subliña Komjer Julio Hornay. (anu)
