PM Inagura Berlin Ramelau
TIMOROMAN.COM – (DILI) Primeiru Ministru Taur Matan Ruak, ofisialmente inagura Ro Berlin Ramelau iha Portu Dili no hetan bensaun husi Rev. Arsebispu. Dom. Virgilio do Carmo, SDB, Taur Matan Ruak konsidera Ro Berlin Ramelau nuudar prezente boot ida ba populasaun sira iha Timor-Leste, iha ninia diskursu ba serimonia inagurasaun Ro Berlin Ramelau, iha portu Dili, segunda feira, 20/12/2021.
Primeiru Ministru Taur Matan Ruak iha ninia diskursu inagurasaun Ro Berlin Ramelau, hateten, projeitu ida ne’e sai hanesan prezente bo’ot ida ba populasaun Oe-Cusse no Atauru em partikular nomos prezente bo’ot populasaun Timor-Leste tomak, liuliu iha altura ne’ebe ita nia Ro ida hakdasak hela iha ne’e laiha possibilidade atu la’o no projeitu sira seluk iha Ministeriu Transporte no Komunikasaun halo esforsu para garantia ita nia konektividade entre Oe-Cusse ho Dili no Atauro ho Dili.
Prezente ida ne’e so akontese tanba iha parseria di’ak ho Governu Alemaña nomos APORTIL ho kompañia DAMEN ne’ebe konstrui Ro Berlin Ramelau ne’e. Kooperasaun ho alemaña ne’e segundu projeitu ne’ebe mak ita halo depois de ita nia primeiru barco ne’ebe iha tiha ona tinan hira liuba.
“Ha’u hakarak lori Governu Timor-Leste nia naran no ha’u nia naran rasik, hato’o agradese ba kooperasaun Alemaña no ha’u enkoraja para kooperasaun ida ne’e permanese. Sei ha’u la sala primeiru preparativu ba kooperasaun Alemaña ho Timor-Leste nian hahu tinan sanulu resin ba kotuk bainhira hau sei general, tau hatete liuhusi ninia diskursu iha serimonia inagurasaun Ro Berlin Ramelau, iha Portu Dili, segunda, 20/12/2021.
Nia haktuir, iha momentu ne’eba ko’alia konaba transporte maritima no ha’u sei la sala. Ha’u nia tekniku sira iha momentu ne’eba Forsa Armada partisipa reunian barak, iha Ministeriu Transporte no Komunikasaun ho reprezentante Alemaña no la’os de’it ko’alia kona-ba Ro maibe espesialmente ko’alia mos kona-ba posibilidade atu hari’i infraestrutras ba manutensaun Ro nian.
Primeiru Ministru Taur Matan Ruak konta tuir, “Iha momentu ne’eba Hera hanesan fatin ba manutensaun Ro nian maibe depois Altera tiha. Finalmente tinan barakliu, infraestrutura manutensaun Ro laiha, Ro rua ne’e di’ak no kapaz maibe la justifika. Tinan ba tinan Ro sira ne’e haruka ba Indonesia atu halo manutensaun. Ita iha osan atu sosa Ro maibe laiha osan para harii Bengkel, ne’e hanesan sosa kareta foun maibe Bengkel laiha”.
Tanba ne’e hanesan Primeiru Ministru ha’u hakarak apela ba kooperasaun Alemaña, Timor-Leste disponivel atu halo parseria konstrusaun infraestruras ba manutensaun Ro sira iha Timor-Leste no agora numeru Ro iha Timor-Leste aumenta, forsa armada nian iha 2023 iha ro ha’at, rua husi Australia no rua sosa husi Xina.
Komponente Polisia Maritima ita iha Ro rua ne’e seidauk konta sira seluk, transporte no komunikasaun iha Ro rua, kuaze ro ualu. Ita haruka tinan-tinan ba halo manutensaun iha Indonesia, ita lakon rekursu no tempu. Entaun ha’u apela atu Governu alemaña rekonsidera ida ne’e. Sei bele reforsa parseria nee liliu area maritima kompleta ho infraestruturas manutensaun Ro sira nian.
“Ha’u fiar nia kustu sei la liu Ro sira ne’ebe ita sosa sei lae menus tan. Ha’u hakarak aproveita mos ho saudasaun espesial ida ba Ministru Treansporte no Komunikasaun, ne’ebe primeira vez inklui timoroan sira iha tripulante Ro nian. Ba ha’u iha esperiensia hari’i mariñ ida mai husi Guerileiru sira transforma Guerileiru ba mariñeiru, ha’u la komprende tinan 20 depois ita laiha ema para kaer ita nia Ro rasik, entaun ha’u fo parabens MTK ba esforsu ida ne’e. Hau lembra tinan hira liuba ha’u sempre levanta kestaun ida ne’e” nia afirma.
Nia hateten, difisil liu maka transforma Guerileiru ba mariñeiru, agora transforma mariñeiru ba mariñeiru ne’e fasil liu. Entaun ha’u hakarak parabeniza esperiensia ida ne’e espera katak tinan hira tan mai oin totalmente ita nia ema ka Timoroan rasik mak kaer. Ro rua ne’e ou seluk ne’ebe mai tan, ne’e importante loos.
Ne’e simboliza orgullu no determinasaun vontade atu avansa ba oin, muda no adapta aan ba dezemvolvimentu ita nia rai ida ne’e. Husu mos ba tripulantes atu kuidadu ita nia Ro. Ro ida ne’e naran Berlin Ramelau, halo ligasaun entre sidade Berlin ho foho Ramelau ne’ebe simbolu ita nia rai nian.
“Ita bo’ot sira kuidadu didiak atu bele dura no kontinua nafatin iha kondisaun atu servi ita nia populasaun sira. Liliu populasaun sira Oe-Cusse no Atauro ne’ebe presija tebes. Dala ida tan hau agradese ba APORTIL no MTK ho DAMEN no reprezentante Governu Alemaña iha Timor-Leste ba susesu ida ne’e. Apesar dezafiu barak husi Covid-19 maibe nia termina iha tempu lo’os sa tan iha natal no tinan foun.
Entretantu iha serimonia inagurasaun Ro Berlin Nakroma ne’e hetan partisipasaun maximu husi, Vise Prezidente Parlamentu Nasional, Reverendisimu Arcebispo Dom. Virgilio do Carmo, SDB. Señor/a Ministru No Ministra no Membru VIII Governu Konstitusional sira hotu inklui mos deputadu no deputada sira husi Parlamentu Nasional, Distintas deputadu/deputada no konvidadu sira tomak.**
