MTK Aprezenta Tripulante na’in 13 ba PM

TIMOROMAN.COM – (DILI) Ministru Transporte no Komunikasaun, Agustinho Da Silva, aprezenta tripulante timoroan sira na’in sanulu resin tolu ba Primeiru Ministru Taur Matan Ruak, iha serimonia inagurasaun Ro Berlin Ramelau, iha portu Dili, 20/12/2021.

Tripulante timoroan sira na’in sanulu resin tolu ne’ebe mak jere Ro Berlin Ramelau ne’ebe aprezenta husi Ministru Transporte no Komunikasaun ba Primeiru Ministru mak hanesan, Mauricio Nascimento, Simplisio Markus Ximenes, Anacleto Osvaldo da C. F. Belo, Salvador Ximenes, Zeraldo da Costa Marcal, Florensius Flodi Correia, Joel Martinho, Martinho J. F. De Sa, Euzebio dos Santos, Leonardo Marques, Martinho da Costa Quintão, Julião Fernandes, Armando Perreira, tripulante timoroan sira ne’e mak ne’e sei jere Ro Ahi Berlin Ramelau.

Tuir lolo’os ohin depois de serimonia, ro ne’e pasiar ho ita nia entidades VIP sira maibe iha problema tekniku ida, horikalan ha’u konsulta ba ha’u nia tekniku ida ba Olanda. Ohin iha ha’u nia aprezentasaun ne’e mos ha’u hato’o katak tripulante sira falta iha kargu ida bolu naran Chip enginering, ne’e importante tebes.

Wainhira halo viajen ida ne’e tenke prontu, atu akontese buat ruma karik bele asegura. Tekniku ida ne’e iha maibe nia fila tiha fali ba Oalnda. Entaun ohin ita la konsege atu koko Ro ne’e, maibe ha’u nia espetativa oinsa ita bele koopera atu fasilita ita nia populasaun sira iha kontestu loron bo’ot natal no tinan foun.

Ba ita nia populasaun sira ne’ebe iha Oe-Cusse no Atauro ne’ebe uza transporte maritima. Ita nia Ro ne’e kompleta ho ekipamentus ne’ebe maka modernu tebes, entaun ne’e buat foun ida. Ita nia tri[pulantes timoroan sira presija tempu atu familiariza ho ekipamentus modernu sira. Bainhira tripulantes timoroan sira familiariza ona ho ekipamentus sira ne’e sei hetan mos asistensia husi tripulantes estranjeiru ne’ebe maka akompaña sira.

“Hau mos orienta ba prezidente APORTIL no diretor nasional kabotajen atu oinsa maka bele koordena ho ita nia tripulantes sira Ro Berlin Nakroma ne’ebe maka oras ne’e sei iha ne’e. Antes sira ba halo manutensaun ba Ro Berlin Nakroma tripulantes sira ne’e bele fo asistensia ba tripulante sira Ro Berlin Ramelau atu nune’e fasilita populasaun sira”

Konaba folin billete, hau hanoin Ro ida nee ninia natureza no prezensa Ro ne’e atu fasilita ita nia populasaun sira.  Maibe ita sei hare ba ita nia kondisaun ekonomia ita nia populasaun sira nian hodi nune’e ita bele hatur numeru ida ne’ebe razoavel .

“Ita mos tenke hatene katak Ro ahi ida ne’e ninia kustu investimentu bo’ot ho montante milliaun. Rezultadu husi kooperasaun Governu Timor-Leste ho Governu Alemaña ko-finansiamentu husi Governu rua ne’e. Ita nia espetativa maka tenki iha fali retornu ida ba kofre estadu mais importante liu ,maka oinsa ita jere ho responsabilidade no kualidade tuir regra. Agora sasan ne’e iha ona ita maibe nia problema maka oinsa mak ita kuidadu no halo manutensaun ba futuru atu nune’e ita bele uza nafatin, ida nee mak ita nia espetativa”.

“Ita sei husu asistensia husi tripulantes sira Ro Berlin Nakroma atu nune’e akompaña tripulantes sira Ro Berlin Ramelau nunee bele fasilita populasaun sira ba passa natal no tinan foun iha Oe-Cusse no Atauro” hateten Ministru Transporte no Komunikasaun ba jornalista sira bainhira remata serimonia inagurasaun Ro Berlin Ramelau, iha portu Dili, 20/12/2021.**