Suku Kampung Alor Okupa Primeiru Lugar
TIMOROMAN.COM – (DILI), jogu komunitariu ne’ebe mak realiza iha kampu volley ball kampung alor, ekipa feto husi suku Kampung Alor mak okupa primeiru lugar, Dili, tersa, 21 de Dezembru 2021.
Reprezentante sefi komisaun organizadora Julio Fatima Soares hateten, Jogu ida ne’e hanesan animasaun ba populasaun tomak iha parte Dom. Aleixo, munisipiu Dili. Jogu ida ne’e hahu iha dia 9 de Dezembru no remata iha dia 21 de dezembru tinan ida ne’e. Jogu ida ne’e realiza ba loron komemorasaun 28 de novembru ba loron proklamasaun da independensia Timor-Leste ba dala 46 maibe atraza tanba ezekusaun finanseiru ne’e tarde.
Jogu volley ball nivel komunitariu ida ne’e iha klube Feto no Mane, no klube sira ne’ebe mak sai vensedor iha jogu ida ne’e maka klubu volley ball feto sai vensedor ba primeiru lugar maka Kampung Alor, segundu lugar maka Komoro no tersiru lugar maka Fatuhada. Entretantu vensedor ba Mane okupa husi Komoro A no segundu lugar husi Komoro B no terseiru lugar okupa husi Fatuhada, reprezentante sefi Komisaun Organizador Julio Fatima Soares hateten ba jornalista sira iha kampu volley ball depois de jogu remata.
Jogu komunitariu ida ne’e realiza tanba hetan apoiu husi Sekretariu Estadu Joventude no Desportu (SEJD) no CCWC nomos autoridade lokal sira. Osan ne’ebe mak aloka mai hodi realiza jogu ida ne’e ho nia montante maka U$ 5.773.
“Klubu sira ne’ebe mak sai vensedor ba primeiru lugar sei hetan osan ho montante U$ 300, no segundu lugar hetan U$ 2.50 no terseiru lugar U$ 200, ba vensedor feto no mane ba jogu volley ball” nia esplika.
Iha fatin hanesan vensedor husi ekipa feto kampung alor, reprezenta husi Idalinda Maria Oki hateten katak, nia parte sente kontente no agradese bainhira ho nia maluk sira bele okupa primeiru lugar iha jogu volley ball feto ninian, nomos agradese ba sefi aldeia no sefi suku ho komunidade sira kampung alor ne’ebe suporta sira iha jogu ida ne’e, Idalinda Oki hateten ba jornalista iha kampu volley ball kampung alor depois de remata jogu, tersa, 12 de dezembru 2021.
Nia haktuir, “difikuldade ne’ebe durante ne’e ami hasoru maka dalaruma joga bee laiha no farda menus tebes maibe espera katak ba oin ami sei halo kompleta no hadia diakliu tan”.**
