Governu Sei iha Tusan Millaun $4,2 ba Berlin Ramelau
TIMOROMAN.COM (DILI)–Governu Timor-Leste (TL), sei iha tusan millaun $4,2 hodi halo pagamentu finál ba ró Berlin Ramelau, ne’ebé to’o ona portu Dili.
Prezidente Administrasaun Portuáriu Timor-Leste (APORTIL), Flávio Cardoso Neves hateten, Ro Berlin ramelau nia inspesaun hotu ona iha loron Sábadu, hetan partisipasaun husi kompañia ne’ebé konstrui Ró ne’e no konsultóriu sira no mos Diresaun Nasional Transporte Maritima.
“Agora ita halo fali relatóriu atu entrega ba iha Ministériu Finansa hodi bele prienxe rekezitu administrasaun nune’e realiza pagamentu sira, tanba agora ita seidauk selu kuaze millaun $4,2,” nia hateten iha edifísiu Ministériu Transporte Komunikasaun (MTK), Kaikoli, Kuarta (15/12).
Governu sei inaugural Ro Berlin Ramelau iha loron 20 Dezembru 2021, nune’e hahu operasaun, hodi fasilita komunidade Dili–Oe-Cusse no Atauro maski seidauk halo pagamentu finál.
Ro Berlin Ramelau agora daudaun ne’e to’o tiha ona Timor, maibé sei iha responsabilidade kompaña nian, tanba seidauk asina termu de entrega entre kompañia ho governu.
Parte APORTIL haree katak, hafoin inaugurasaun ró ne’e tenke hala’o ona operasaun atu bele fasilita komunidade ne’ebe passa natal no tinan foun iha Oe-Cusse no Atauro.
Ró Berlin Ramelau ne’e modernu tebes ho estandarizasaun Europa, maski konstrui iha Xina, maibé ho estandar Europa.
Agora daudaun ne’e APORTIL promove ona timor-oan na’in 14 ne’ebé preparadu, maibe sei buka tan ema profisionál balun husi estranjeiru atu akompaña sira nafatin.
Kapitaun Ró Berlin Ramelau ne’e timor-oan rasik, maibé presija kapitaun téknika ba mákina ida atu nune’e kuandu hahu operasaun nia bele kontrola nafatin.
Durante ne’e, ekipa tekniku na’in rua husi olanda akonpanha nafatin kapitaun timor-oan sira to’o loron 29 Dezembru tinan ne’e.
“Importante maka fiar ba timor-oan sira, tanba sei ita ko’alia de’it maka la iha pratika mós hanesan de’it,” Flavio Cardoso Neves, esplika.
Ró berlin Ramelau ne’e modernu tebes tanba bainhira atraka iha portu, kapitaun Ro ne’e utiliza remote de’it hodi muda Ro ne’e rasik.
Tanba uza ekipamentu ne’ebe modernu ka mais teknolojia, entaun tenki fiar ba kapitaun timor-oan sira.
Kona-bá pressu billete APORTIL labele ko’alia lai tanba pressu billete ne’e Konsellu Ministru no Governu maka sei diside tanba bazeia ba desizaun Konsellu Ministru, bele aumenta pressu billete ou mantein nafatin hanesan Nakroman.
“Ro Berlin Ramelau ne’e mai la’os atu kejar bisnis maibe hakarak atu garante konektividade transporte maritima Dili–Oe-Cusse no Atauro la’o nafatin,” nia hateten.
Kapasidade Ro ne’e iha 308 pasajeiru, maibé iha posibilidade atu tula 350, depois kareta 12 ate 15, no ninia diak nee mak iha asesu ba ema ho difisiensia, kaixaun fatin no la hanesan ho Ro uluk Berlin Nakroma, tanba Ro ne’e modernu tebes. (Bubun)
