Povu TL Sente Lakon Duni Erói Max Stahl
TIMOROMAN (DILI) — Povu Timor-Leste (TL) Sente lakon duni Jornalista Max Stahl ne’ebé kontribui makás ba luta libertasaun nasionál liu husi halo filmajen ba Maskre Santa Kruz, no masakre sira seluk tan hodi loke mundu nia matan.
Realidade sentimentu lakon ne’e, povu ne’e espresa iha loron ohin, bainhira Sinza husi Matebian Max Stahl to’o iha Aeroportu Internasionál Prezidente Nicolau Lobato ho Aviaun Qantas husi Austrália iha tuku 11:30 otl.
Antuziasmu sura la nahas, tanba povu ne’e hahú kedan husi lider karismátiku Kay Rala Xanana Gusmão ho lider diplomata José Manuel Ramos Horta, inklui membru Governu sira, Parlamentu no povu baibain, ba hasoru no halo konvoi hamutuk too iha Sentru Audiovizual ne’ebé matebian rasik harii.
Entidade hirak ne’e presta omenajen, hanesan jestu respeitu no jestu domin ba nia nuudar libertadór ida iha tempu funu.
ALende ne’e, povu ne’e konsidera Max Stahl laos hanesan ema estranjeiru maibe hanesan Timoroan nune’e iha serimonia simu sinza ne’e, ho lia-dadolin husi lia-na’in sira, no mós dansa kultura Timor nian, ne’ebé akompaña mós ho parada militár.
Husi parte Governu mós agradese ba parte familia ne’ebé ho laran luak no domin deside ho oferese matebian ninia sinza atu bele haloot iha Timor Terra de Santa Kruz, terra ne’ebé Max mos hola parte hodi liberta.
“Hato’o bem vindo ba Max Stahl ho nia família,” Ministru Prezidensia Konsellu Ministru, Fidelis Leite Magalhães, hateten.
Oras ne’e daudaun, Sinza Max Stahl tau hela iha Sentru Audiovizual Dili, no tuir planu iha 17 Dezembru sei halao funebre iha Semiteriu Santa Kruz, no oras ne’e entidade oioin hala’o hela omenajen no rez aba Max ni klamar atu bele hetan rahun diak, hamutuk ho Anju no Santu Sira tuir fiar Kristaun nian. (Jelus)
