PR Lú Olo Veta Dekretu Husi PN Kona-bá Estatutu Majistradus Judisiais
Díli —Tuir Konstituisaun RDTL, Prezidente Repúblika (PR), iha kbiit atu promulga ka veta Dekretu ne’ebé Parlamentu Nasionál (PN) aprova iha ninia sesaun Plenária ka Dekretu-Lei ne’ebé Governu aprova liuhusi Konsellu Ministru (KM).
Iha loron 16 Novembru liu-bá, Parlamentu Nasionál haruka mai Prezidente Repúblika Dekretu ida kona-bá Estatutu Majistratura Judisiais.
Tuir Komunikadu ne’ebé Timoroman.com asesu husi Palásiu Prezidensiál Nicolau Lobato, Díli, Kuarta (15/12/2021), hateten katak, hafoin tetu kle’an Dekretu ne’e, Prezidente deside veta no haruka fila diploma ne’e ba Parlamentu Nasionál, tuir artigu 88.o n.o 1 Konstituisaun Repúblika.
Liu husi mensájen haruka ba Parlamentu Nasionál, Prezidente Repúblika husu ba deputadu sira atu hadi’ak Dekretu ne’e iha mós ámbitu Lei kona-bá Organizasaun Judisiária.
Lei ida-ne’e promulga ona husi Prezidente Repúblika no publika ona iha Jornal Repúblika, iha 2 Dezembru 2021.
Tuir lei organizasaun judisiária, juíz sira iha Tribunál Administrativu, Fiskál no Kontas haktuir Estatutu Majistratura Judisiais no haktuir mós jurisdisaun husi Konsellu Superiór Majistratura Judisiál.
Dekretu kona-bá Estatutu Majistradu Judisiál sira tenke haktuir regra-sira tama ona iha Lei Organizasaun Judisiária.
Iha mensájen haruka ba Parlamentu Nasional, iha 10 Dezembru 2021, Prezidente Repúblika fó-hatene mós fundamentu sira seluk relasiona ho ninia desizaun veta Dekretu kona-bá Estatutu Majistradus Judisiais.
Parlamentu Nasionál sei tetu fundamentu hotu-hotu hato’o husi Prezidente Repúblika iha sesaun Plenária iha loron sia nulu nia laran (90 dias), hahú sura husi loron ne’ebé órgaun soberania ne’e simu dekretu ne’e ho mensájen prezidensiál kona-bá veto.
Parlamentu Nasionál bele hili dalan tolu:
1. Bele halo konfirmasaun ba votu ho deputadu, mínimu na’in 33. Ho votu a favór husi maioria absoluta ne’e, Parlamentu Nasionál bele haruka filafali ba Prezidente Repúblika, hodi promulga Dekretu ne’e iha prazu loron ualu nia laran, tuir artigu 88.on.o 2 Konstituisaun Repúblika;
2. Bele halo expurgasaun ka alterasaun ba Dekretu ne’e tuir fundamentu sira ne’ebé Prezidente Repúblika hato’o liuhusi nia mensájen;
3. Parlamentu Nasionál la halo reuniaun to’o prazu loron 90 remata. Bainhira Parlamentu Nasionál hili dalan ida-ne’e, Dekretu ne’e kaduka ka mate. (Gracio)
