PD-FM Konkorda PN Hasai Imunidade Ba Vicente Guterres
Timoroman.com-Membru Parlamentu Nasional (PN) husi Bankada Partidu Demokrátiku (PD) ho Frente Mudansa (FM) konkorda atu hasai levantementu imunidade ba eis Prezidente Parlamentu Nasional, Vicente Guterres atu ba hatan iha Tribunal relasional ho kazu ne’ebé nia komete.
Antes ne’e iha semana hirak liu ba Tribunal Distrital Dili (TDD) haruka ona karta karta notifikasaun ba Parlamentu Nasional (PN) hodi husu atu hasai levantamentu imunidade ba Deputadu, Vicente Guterres atu ba hatan iha justisa.
Antes ne’e, Prezidente PN Adérito Hugo da Costa hateten, nia parte simu ona karta notifikasaun husi tribunál kona-ba kazu Deputadu Vicente Guterres, tanba ne’e nia sei halo enkontru hó liders bankada 4 iha PN hodi hare hamutuk atu halo andamentu nune’e bele baixa ba komisaun G ne’ebé trata ba asuntus Étika atu halo audiensias hó Deputadu Vicente Guterres kona-ba kazu ne’ebé nia komete.
Bainhira halo hodi hafoin komisaun refere halo relatoriu pareser hodi hato’o ba meza plenariu atu halo votasaun hodi hasai levantamentu imunidade ba Deputadu eis PN Vicente Guterres hodi ba hatan iha justisa.
Prezidente Bankada Frente Mudansa, José Luis Guterres husu ba Deputadu eis Prezidente PN, Vicente Guterres atu ba iha Tribunal hodi halo klarifikasaun, hodi nune’e labele hafor nia naran ho familia tomak.
“Ha’u sente ladun di’ak bainhira ita kontinua ho bu’at ne’e no ita presiza kumpri mós Konstituisaun da Repúblika hodi hatudu ba ema hotu katak, la iha ema ida mak as liu lei, ne’e duni ha’u ha’u sei vota afavor.” dehan, José Luis Guterres iha Parlamentu-Nasional, Sesta-Feira foin lalais.
Nia haktuir, eis Prezidente PN prontu atu ba hatan lalais ida tribunál hodi responde tiha krimi ne’ebé nia halo, tanba nia parte sente la halo aat bu’at ida maibé nia esforsu atu ekonómiza ba osan ne’ebé Estadu iha.
Frente Mudansa konkorda ho retiradu imunidade ba Deputadu, Vicente Guterres nian tanba bazeia ba Konstituisaun RDTL, polítikus sira labele konsidera katak sira aas liu fali lei no konstituisaun.
Prezidente Bankada PD, Lurdes Bessa hateten, prosesu ba kazu ne’e la’o ona no hein hela troka komunikasaun entre PN ho tribunál.
“pozisaun PD nian ba kazu hotu-hotu ne’ebé lori ba iha plenariu PN mak hasai levantamentu imunidade hodi bele ba hasoru tribunál. Desde uluk Bankada PD sempre afavor ba kualker membru, tantu membru Parlamentu, Governu inklui mós membrus PD sempre vota afavór atu hasai imunidade para ema ne’e bele responsabiliza ba justisa, ne’e duni se karik mai ona iha plenariu ita sei vota.” tenik Deputada Lurdes Bessa.
Entertantu, Prezidente Global Orgizasaun Parlamentares Anti Korupsaun (GOPAC), Deputadu Françisco Miranda Branco hateten, tuir sistema prezidensialista orgaun soberania sira ne’ebé independensia maibé mós iha interdependensia tanba hakarak atu hametin Estadu iha prosesu konsolidasaun Estadu nian.
Prezidente GOPAC ne’e dehan, sira nu’udar polítikus husi parte orgaun soberania Estadu nian tenke hatudu vontade polítika ne’ebé di’ak, tan ne’e mak sira hakarak konsolida sistema hodi fó fi’ar ba Estadu Timor-Leste.
“Se ita la kolabora no tau nafatin interese individual entaun ita mak infrakeza ita nia sistema instituisaun sira ne’ebé ka’er justisa.” esplika Prezidente GOPAC, Françisco Miranda Branco.
To’o notisia ne’e publika, Jornalista Diáriu Timoroman seidauk
hetan konfirmasaun husi Deputadu Vicente Guterres.(jax)
