Ines : Husu Lia Lós no Justisa Ba Governu Japaun
Timoroman.com– Avo Ines Magalhães Gonçalves (81) núdar feto Timor oan ida husi suku Obulu, Posto administrativu Atsabe, Municipio Ermera, hamutuk ho ninia belun sanulu resin ualu (18) inklui Avo Ines ne’ebé sai vitima ba militar Japanes iha tempu funu mundial segundu (II Guerra Mundial) iha tinan 1942-1945.
Maiske avo Ines nia belun nain 8 mate ona no hela deit sira nain 10, foin lalais avo Ines hetan apoiu husi povu Japaun no akompañadu husi delegasaun advokasia Asosiasaun HAK (Marina Galuçho) ho avo Ines nia oan mane (Leonel Barreto) partisipa iha konferensia Internasional iha Korea no Japaun, iha konferensia ne’e avo Ines fó sai testamunha kona ba eksgravidaun seksual hodi husu lia lós no Justisa ba Governu Japaun.
Aleinde ne’e hetan apoiu makas husi Asosiasaun HAK Timor Leste nian konsege fasilita avo Ines ba partisipa iha konferensia Internasional iha Korea no Tokyo (Japaun) durante semana ida.
Hafoin de remata konferensia ikus iha Tokyo, iha semana kotuk avo Ines akompaña husi delegasaun Asosiasaun HAK Timor Leste advokasia Marina Galuçho ho avo nia oan mane Leonel Barreto fila hikas mai Timor Leste. Bainhira to’o iha aeroportu Internasional Prezidente Nicolau Lobato Dili, simu husi advokasia asosiasaun HAK no membru balun.
Iha konferensia Pers, advokasia Honorio de Almeida ninia introdusaun hateten, Avo Ines vitima segundu Guerra mundial, invazaun Japaun iha Timor ne’ebé hahú iha tinan 1942-1945.
“Avo Ines núdar vitima ida ne’ebé oras ne’e dadauk sei moris, hela sira (vitima-red) nain sanulu (10), maibe avo Ines mak Asosiasaun HAK senti (hare-red) ninia fiziku diak uitoan, entaun Asosiasaun tenke lori nia ba Korea no Japaun hodi fó kesaksian (testamuña-red) iha konferensia Internasional ne’ebé realiza iha fulan kotuk liu ba iha Korea no foin dadauk konferensia ida iha Japaun kona ba vitima segundu Guerra mundial sira, liuliu feto sira,” haktuir Honorio ba Jornalista, iha erportu Nicolao Lobato, Comoro- Dili, foin lalais ne’e.
Nia esplika durante semana ida, avo Ines partisipa iha konferensia Internasional iha Tokyo (Japaun), hodi fó ninia kesaksian ba hahalok militar Japaun nian durante 1942-1945 iha Timor.
Nomós avo ninia prezensa iha konferensia ne’ebá aprezenta vitima segundu Guerra mundial iha Timor, liuliu ba feto sira, enkuantu iha fulan kotuk liu ba, avo mos partisipa iha eventu hanesan iha Korea hodi fó mos testamuña ba Governante sira husi Japaun no aktivista direitus umanus internasional sira,
Fatin hanesan,Leonel Barreto oan mane husi Avo Ines relata kona ba, durante sira partisipa iha konferensia Internasional iha Korea no iha Tokyo, avo Ines koalia ba Governu Japaun iha konferensia katak, nia buka Justisa no lia lós.
“Iha Korea no Tokyo, avo Ines koalia ba Governu Japaun katak, “hau (Avo Ines-red) mai laos atu buka buat ne’ebé diak no furak, maibe hau mai atu buka justisa no lia lós,” konta tuir oan husi Avo Ines ne’e.
Hanesan oan mane Leonel husu ba Governu Japaun tenke husu deskulpa ba vitima sira ne’ebé mak terus iha momentu ne’ebá, inklui avo Ines. Nune’e mos durante ne’e Governu Japaun la tau matan ba avo Ines, maibe Asosiasaun HAK mak sempre fó apoiu ba Avo Ines hodi sustenta nia moris to’o agora.
“Iha audiensia, Governu Japaun deklara, bainhira tropa Japaun ba halo funu iha fatin ne’ebé deit, kuandu iha violasaun seksual iha fatin ruma, Governu Japaun tenke selu ema vitima ne’e, asuntu ne’e la sala Governu Japaun koalia iha tinan 1993 liu husi Amu Bispo ida (la temi naran-red) mak haktuir asuntu ne’e,” relembra Leonel.
“Ho ida ne’e, durante ne’e Govenu Japaun la tau matan ba avo Ines, uniku Yayasan HAK mak tau matan fulan tolu (3) dala ida lori avo sira nia presija (nesesidade-red) hodi moris to’o agora. Ne’eduni la haluha, ami fó obrigadu ba Asosiasaun HAK ne’ebé mak iha ne’e ho koligasaun ne’ebé mak servisu hamutuk hodi luta nafatin ba vitima sira,”afirma Leonel.
Kestaun hanesan hato mos husi advokasia Asosiasaun HAK ne’ebé tau matan ba vitima segundu Guerra mundial, Marina Galuçho afirma katak, iha konferensia ne’ebé Avo Ines partisipa, fó sai sasin ba akontesimentu eksgravidaun seksual ne’ebé akontese ba avo iha momentu 1942-1945 ne’ebé halo husi militar Japanes nian.
“Konferensia ne’ebá ami hasoru direitamente ho Ministru Negosiu Estranjeiru Japaun nian, atu oinsa vitima ida-idak husi Nasaun ha’at (Timor Leste, Indonesia, Korea, no Filipina) ne’ebé partisipa iha konferensia ne’e, sira ida-idak ho sira nia ejijensia hakarak husu ba Governu Japaun atu husu deskulpa ofisial ba vitima sira no fó rekompensasaun ba vitima sira. Tanba ita hare katak Japaun Nasaun bo’ot ida, maibe Nasaun ne’ebé mak labele fó asistensia ka buat ruma ba vitima sira, ne’e mak nafatin ita (Asosiasaun HAK-red) hakarak ejije ida ne’e,” realsa Marina.
Nia mos hatuir, hatan ba ejijensia hirak ne’e, Governu Japaun simu, maibe seidauk klaru kona ba asuntu refere. Tanba momentu ne’eba , Asosiasaun HAK mos husu ba Governu Japaun katak, Governu Japaun rekoñese ona vitima sira iha Korea, nusa Governu Japaun labele rekoñese vitima iha Timor Leste,(ViQ)
