LPV Aprova Ona Iha Espesialidade
Timoroman.com – Lei Pensaun Vitalisia (LPV) ne’ebé daudauk ne’e sai preokupasaun ba ema barak hetan ona aprovasaun iha diskusaun espesialidade.
Kuarta-Feira (16/11/2016) Komisaun Eventuál (KE) hala’o diskusaun ba Lei Pensaun Vitalisia (LPV) no lei ne’e rasik hetan aprovasaun iha diskusaun espesialidade, ne’e duni hein atu aprezenta ba plenaria hodi halo aprovasaun finál global.
Informasaun ne’e hato’o husi Prezidente Komisaun Eventual Lei Pensaun Vitalisia, Izilda da Luz ba Jornalista sira hafoin remata diskusaun.
“Diskusaun espesialidade ba Lei Pensaun Vitalisia orsida (horseik-read) ami halo remata, ne’e duni ami bele lori ona mai iha plenaria, maibé ida ne’e depende ba ajenda husi gabinete Prezidente Parlamentu Nasional hodi marka ninia loron.” dehan Izilda da Luz.
Reprezentante povu ne’e haktuir, Komisaun Eventual hakarak iha fulan ida ne’e ka fulan Dezembru nia laran tenke hato’o ona ba meza Prezidente Parlamentu Nasional (PN), hodi nune’e bele tau ona iha ajenda para halo aprovasaun iha finál global.
Antes ne’e, iha diskusaun Lei Pensaun Vitalisia ba jeneralidade nian, membru Deputadu husi bankada FRETILIN, Ósorio Florindo hato’o proposta foun ida kona ba re-integrasaun nian.
Kontiudu husi proposta ne’e hateten, bainhira sira nia mandatu remata ona sira sei la simu osan husi pensaun nian, maibé sei simu de’it osan husi sira nia mandatu ne’ebé remata ona.
“Ami dada tempu oituan tanba proposta Deputadu Ósorio Florindo dehan nia (Ósorio-read) sei prepara hela.”dehan nia.
Aprovasaun ba finál global nian tenke halo iha plenariu, nune’e bele hetan partisipasaun husi deputadus na’in 65 , nune’e sira mós bele hatene kona ba serbisu ne’ebé mak membrus Komisaun Eventual halo.
“Ami halo mudansa lubuk ida, karik hanesan uluk eis titulares sira iha direitu ba pasazen internasional, ami limita.” esplika Izilda.(jax)
