Forsa Tenke Hatudu Ezemplu Di’ak
Timoromna.com-Instituisaun FALINTIL Forsa Defeza Timor-Leste (F-FDTL) iha papel ne’ebé importante hodi sai nu’udar lutu ba nasaun. Ne’e duni, tenke sai ezemplu di’ak hodi banate tuir dutrina veteranus nian.
Xefe Estadu Maior Jeneral F-FDTL, Maior Jeneral, Lere Anan Timur husu ba membru F-FDTL tomak tenke hatudu ezemplu di’ak ba povu, la’os atu hatudu fali ezemplu ne’ebé la di’ak ba povu hodi involve an iha jogu Bola Guling (BG).
Bainhira tama ba forsa la’os atu involve fali iha jogu. Jerasaun foun tenke iha konsiensia no tenke banati tuir dutrina veteranus nian.
“komandante sira sempre fó orientasaun, tantu membru Polisia Nasional Timor Leste (PNTL) no F-FDTL, maibé dala ruma soldadu sira lakohi rona komandante sira entaun dala barak soldadu sira sai ba liur halo buat hotu konforme sira nia hakarak de’it” dehan Maior Jeneral F-FDTL, Lere Anan Timur iha ninia deskursu bainhira partisia seremonia rekoila restumortais iha Munisipiu Ainaro Vila, Segunda-Feira (14/11).
Jeneral fitun rua ne’e halo komparasaun katak, iha tempu funu nia laran bainhira komandu fó ona orientasaun ba soldadu hakarak ka lakohi tenke halo tuir saida mak komandante hateten, maibé iha situasaun agora soldadu sira senti katak sira mak bo’ot liu ona.
“Agora ne’e simu kareta no osan, maibé sira kontinua hatudu nafatin ezemplu ne’ebe mak la di’ak ba povu.” tenik Lere.
Lere husu ba forsa jerasaun foun sita tenke halo tuir ezemplu ne’ebé mak veteranus sira husik hela. Eis gerileirus haktuir katak, bainhira nia (red-Lere) sei lidera nafatin F-FDTL mak hare soldadu balun hatudu hahalok ne’ebé mak la di’ak sei hasai husi instituisaun F-FDTL.
Jeneral Lere mós kestiona atetudi soldadu balun ne’ebé iha finda semana lakohi ba uma hodi hare familia mais ba fali diskoteka hodi halo problema tun sai, depois bosok ferik oan dehan halo hela enkontru, entaun ida ne’e ezemplu ne’eb’e la di’ak ba sosiedade sira.
“sai militar tenke loloos, tanba jerasaun foun sira mak agora halo seguransa ba ulun bót sira, ne’e duni veteranus tenke fó motivasaun di’ak ba jerasaun foun sira atu nune’e bele sai seguransa profesional iha nasaun ida ne’e.” husu Lere. (anu)
