Komunidade Amiasa Impede Projetu ‘Pelican Paradise’ Iha Tasi Tolu
TIMOROMAN.COM – Komuninidade Tasi Tolu amiasa sei impede projeitu ‘Pelican Paradese’ iha tasi tolu ne’ebe halao husi emprezariu internasional husi Malayzia.
Relasiona ho akordu ne’ebe Primeiru Ministru, Mari Bim Amude Alkatiri, halo ho empreza husi Malayzia kona ba hari ‘Pelican paradise’ iha area Tasi Tolu.
Nune’e, iha konferensia imprensa ne’ebe halao iha Tasi Tolu Porta Voz, Alcino V. Exposto husu klarifikasaun husi PM Alkariti, tanba molok asina akordu ba projeitu ‘Pelican paradise’ sedauk iha kordenasaun ka dialogu ho komunidade iha fatin refere.
“Se bainhira PM Alkatiri la halo dialogu ho Komunidade sira iha fatin ne’eba, ami sei impede Projetu ‘Pelican Paradise’, ” afirma Alcino ba jornalista, iha uma adat Tasi Tolu, Sabadu (17/02).
Nia esklarese , agora dadaun komunidade ne’ebe mak. hela iha area Tasi Tolu atinji ona uma kain besik rihun Sanulu resin, ne’e duni hanesan povu sira nafatin husu klarifikasaun ba desizaun PM kona ba projetu ‘Pelican paradise’ ne’ebe atu harii iha Tasi Tolu.
Ne’e duni, nia haktuir bazeia ba Konstituisaun Republika de Timor Leste, iha artigu 2 aliña 4, artigu 3, artigu 54 aliña 3, artigu 58 ne’ebe refere liu ba valorizasaun norma lisan rai nian ba sidadania no direitu sidadaun ba ninia familia atu iha uma ida ho nia kondisaun di’ak no privasidade familiar.
Nune’e nudar komunidade hamutuk ho Igreja katolika husu ba PM trata komunidade ho dignidade no direitu hanesan tuir lei ne’ebe vigor iha nasaun ne’e. Tanba, rai Tasi Tolu pertensia mos ba propetaria misaun ne’ebe sertifikadu iha hela.
“Ami rekomenda ba PM katak ezjizensia komunidade sira nian, la konsedera maka sei iha impedementu ba Projetu ‘Pelican paradise’ ne’ebe sei halo iha Tasi Tolu,” katak Portavos ne’e.
Alcino dehan , to’o oras ne’e PM sedauk halo dialogu ruma ho komunidade sira para rona direita husi PM, maibe komunidade sira haree deit iha Televizaun, no iha Jornal sira.
“Ami hakfodak rona informasaun ne’e, tanba PM ne’e laos Ministru babain, ne’e duni ami PM oinsa mak bele konsedera ami no bele buka tempu atu halo dialogu ho ami, nune’e bele intende malu molok implementa projetu ne’e,” sujere Alcino.
Tuir nia, kona ba dezemvolvimentu komunidade sira aseita, tanba Timor hanesan nasaun ida, ne’e duni komunidade persiza fo kontrubuisaun, mais labele suru komunidade hasai komunidade arbiru deit.
“Se Governu oferese fatin dignu ba Komunidade sira, komunidade prontu atu kolabora, maibe persiza PM tenke halo dialogu ho komunidede sira iha fatin ne’e,” katak nia.
Fatin hanesan reprezentante Igreja, Manuel C. Corria hatete, Rai Tasi Tolu ne’e komunidade sira kordena ona amu Parokia, no sertifikadu mos mai hosi parokia ida ne’ebe sai eveidensia ida ne’ebe forte tebes ba komunidade sira.
Maibe, projetu ne’ebe mak atu implementa ne’e sedauk kordena ho Amu Parokia, hodi nune’e Amu Parokia mos suporta komunidade halao konfrensia ida ne’e.
Aleinde ne’e Lia Nain Benancio Ximenes “Avo Tasi” hatutan, rai Tasi Tolu liliu ba fatin ne’ebe mak komunidade sira hela dezde ninia avo sira ne’ebe mak fo han rai nain sira iha fatin hitu iha Tasi Tolu hanesan Tasi Maria, Tasi Bikan, Tasi Ailalet, Aibikan Lulik, Aikadiru Lulik, Fatu banku lulik,Tasi Maniko lulik.
“Se Projetu ne’e mak halo duni, ne’e signifika kala ita ne’e mout hotu tun ba Tasi laran,” konta tuir lia nain ne’e.
Tan ne’e nia husu ba estadu tenke rekuñese mos rai lulik fatin hitu ne’e, no labarik (Rai Nain) iha 21, atu nune’e buat hotu ne’ebe estadu hakarak halo sei lao diak. (mar)
