Marí Konvida Xanana Asumi Prezidente NF
TIMOROMAN.COM- Primeiru Ministru (PM) Marí Bin Amude Alkatiri sei konvida Kay Rala Xanana Gusmão ba kargu Prezidente Negosiasaun Fronteira (NF) liu husi karta.
PM Mari Aklatiri hateten sira sei haruka proposta ba Xanana, maibé hakarak rona opiniaun ruma husi nia (Xanana red) mak foin hato’o proposta ba hodi nia bele tetu rasik.
“Sekarik Xanana simu duni proposta sai Prezidente Negosiasaun Fronteira tasi Timor Leste ninian, nomos dezenvolvimentu area tasi mane nian, ha’u sei propoint fali ba Prezidente Republika (PR) Francisco Guterres ‘Lú Olo’ atu fó posse ba Prezidente Autoridade Liña Fronteira nian,” dehan PM Alkatiri ba Jornalista, bainhira informa enkontru Konsellu Ministru ba PR Lú Olo, iha Palasiu Prezidensial Nicolau Lobato, Bairru-Pite, Kinta (05/10).
Iha sorumutu ne’e mos PM Alkatiri informa ba PR Lu Olo, kona ba situasaun jeral ne’ebé akontese loron-loron inklui mós defeza no seguransa. Nomos relata membru Governu ne’ebé sedauk kompleta.
Tanba, programa Konsellu Ministru la’o ona. Maibe, sedauk aprova husi proposta oin-oin mai husi Ministeriu mak balun hakarak hatama tan programa balun no balun hakarak hasai tan programa balun.
Tán ne’e mak programa Konsellu Ministru sei aprova programa hirak ne’e hodi Segunda, 9 Outobru 2017, sei haruka ba Parlamentu Nasional ne’e konkreitu.
Tanba membru Governu foun atu aprezenta iha loron segunda hodi bele haruka mai Gabinete Prezidente Republika.
“Programa hirak ne’ebé mak aprova ona iha konsellu Ministru ne’e ba tinan lima nia laran la’os ba 100 dias deit mak oportunidade haree ba infrastrutura no be’e mo’os nian, inklui mos eletridade ba komunidade ne’ebé mak sedauk asesu,” katak Mari. (anu)
