MUTL Fo Ultimatu ba PN
TIMOROMAN.COM–Parlamentu Nasional (PN) kontinua desidi lelaun kareta prado no sosa karreta foun, Movimentu Universitariu Timor Leste (MUTL) fo ultimatu ba PN atu halo kanselamentu.
Asaun ne’ebe MULT hato’o liu husi karta protesta ne’ebe diriji ba PN ho parzu loron tolu ba PN atu fo resposta karta refere.
Sekretariu Prezidente PN, Lidia Norberta, hateten PN simu duni karta ida mai husi MUTL ho opsaun maka kansela, no invalida desizaun ne’ebe mak foti ona husi PN atu sosa Prado foun.
Bazeia ba karta husi MUTL tama iha dia (2/10) sira fo loron tolu de’it ba iha PN atu fo resposta, ne’e direitu liberdade ba sidadaun hotu hotu hanesan individu, kolektivu, bele hato nia inspirasaun,” informa deputada Lidia Norberta ba Jornalista, iha uma fukun PN, Kinta, horseik.
Nia dehan , PN hanesan orgaun halo ona desizaun, bainhira kria tiha legislasaun hotu tenke kompri mos ba legislasaun ne’ebe maka halo ona. Tan ne’e hakarak hato’o ba entidade hotu katak desizaun ne’ebe mak foti ona ne’e defisil tebes tebes atu halao.
Maiske defisil tenke halo ho rigor ida ne’e mak inportante tanba hanesan entidade hotu akompaña konsellu administrasaun sira reuniaun ona, hodi submete ba Plenaria.
“Desizaun ne’ebe foti husi orgaun reprezentativas husi PN deputadu hotu. Tanba, dezisaun ida ne’e ita tenke mantein nafatin no kontinua memori konstituisional husi III legislatura to’o mai IV legislatura tenke iha kontinuadade komprimisiu ne’ebe mak asumi ona,” relata Sekretariu Prezidente PN ne’e.
Reprezentante povu ne’e haktuir, lei konstituisional hare iha artigu 48 halo ona petisaun, hakarak halo manifestasaun karik iha artigu 42 mos fo dalan. Maibe, tuir lei ne’ebe mak envigor, iha artigu refere mos mesiona halo asaun Pasifika tuir lei.
Tanba, prosedimentu legais sira ne’ebe maka MUTL sira hakarak halo manifestasaun karik husu atu tuir prosedimentus legais ne’ebe iha informa ba autoridade Seguransa. Ida ne’e maka espresaun dalan liberdade la taka ne’e meus ida halo nusa atu bele komunika ba malu atu bele hetan solusaun ida ne’ebe diak.
“Prezidente PN mos hakrak tebes atu hasoru malu ho representante husi MUTL nian, atu halo dia logo iha fase negosiasaun,” katak deputada Lidia Norberta.
Antes ne’e mos Prezidente PN hato’o ona ba publiku liu husi media katak sosa kareta foun ne’e laos desizaun foun. Tanba, legislatura anterior iha tiha ona Orsamentu Jeral Estadu (OJE) atu sosa karreta foun no orsamentu ne’e sai tiha ona lei OJE 2017 nian aprova tiha ona iha 2016.
Sorin seluk mos MUTL Porta Vos Jones Chege infornma ba jornalista katak, karik deputadu IV legislatura no eis deputadus III legislature PN la responde MUTL nia eziijensia maka MUTL sei halo asaun Pasifika iha tempu badak nia laran. (MJ9)
