Zevonia Husu Governu Respeita Servisu Jornalista
TIMOROMAN.COM – (DILI) prezidente Asosiasaun jornalista Timor-lorosa’e, Zevonia Vieira, husu ba Governu atu respeita no konsidera servisu jornalista nian bainhira halo kobertura nomos tratamentu ne’ebe justu, hateten ba jornalista iha ambitu komemorasaun loron aniversariu AJTL ba dala 22, iha Otel Luz Clarita, 22 de dezembru 2021
Nia haktuir, Ohin loron Asosiasaun Jornalista Timor-Lorosae (AJTL), selebra aniversariu ba loron moris AJTL nian ba dala 22, ne’e katak AJTL ohin loron iha problema importante ne’ebe mak atu komemora loron aniversariu ho seminariu nasional ho tema konaba independensia editorial iha ambitu eleisaun nomos oinsa mak promove feto jornalista iha sira nia kareira.
Ida ne’e sai tema importante ba AJTL tanba ita hatene katak tinan oin ita sei iha eleisaun prezidensial oinsa maka ita halo media literasia ba partidu politiku sira atu komprende didiak nomos respeita kna’ar no papel jornalista nian durante kobertura iha kampaña eleisaun nian.
Nia hatutan, ida ne’e mak sai hanesan responsabilidade estrutura nian atu halo diskusaun ho partidu politiku sira iha ohin loron nomos oinsa mak promove feto jornalista sira ne’ebe mak kontribui iha instituisaun media, no halo kobertura oioin ne’ebe mak promove igualdade jeneru iha redesaun media sira, ne’e maka sai hanesan asuntu importante ne’ebe mak AJTL hakarak halo iha loron aniversariu AJTL nian ba dala 22.
“Problema barak ne’ebe maka AJTL hasoru maka oinsa halo advokasia, karik presija halo advokasia barakliu konaba lider nasional no partidu politiku sira respeita papel jornalista sira nian no oinsa mak respeita knaar jornalista no oinsa mak bele hasae dignidade jornalista sira nian inklui iha situasaun pandemia Covid-19, jornalista barak mak hasoru obstakulu liuliu konaba salriu” nia esplika
Governu fo osan fronline ba jornalista sira ho osan ne’ebe mak minimu, ema ida hetan 5dolar, ida ne’e AJTL presija halo advokasia makas liu tan aprosima Governu oinsa respeita knaar jornalista nian ne’ebe halo ba interese publiku. Atu nune’e hasae mos benefisiu ka subsidiu ne’ebe mak di’ak ba jornalista sira liuliu iha situasaun pandemia Covid-19, Tamba ita hare katak situasaun ne’e afeita makaas ba servisu jornalista nian nomos instituisaun media sira.
Problema ne’e mak governu ladun konsidera servisu jornalista nian, nune’e liuhusi diskusaun, dialogu no halo seminariu hanesan ne’e hodi bolu instituisaun Governu no partidu politiku sira atu hakbesik no hare jornalista nia papel ne’e importante ka lae, iha situasaun saida de’it liuliu iha oinsa jornalista halo kobertura iha ambitu kampaña eleitoral ho nune’e bele respeita jornalista sira nia servisu.
“Ita labele halo buat ida maibe oinsa ita aprosima halo advokasia no kampña atu influensia governu no partidu politiku sira atu bele respeita servisu jornlista nian, sekarik sira fo subsidiu duni ba jornalista sira sei simu ho montante ne’ebe mak dignu duni ba jornalista sira” nia hateten ba jornalista sira iha ambitu komemorasaun loron aniversariu ba dala 22, iha otel Luz Clarita, tersa, 22 de dezembru 2021
Nia hatutan, tamba ita hare katak servisu jornalista sai nu’udar pilar daha’at ba Timor-Leste, hanesan nasaun demokratiku ho nune’e tenke respeita servisu jornalista, wainhira halo kobertura tanba wainhira laiha jornalista governu nia servisu mos ita lahatene no povu mos la koñese saida maka governu halo ba ninia eleitor sira ka povu.
Ejistensia AJTL kontinua halo aprosimasaun, liuhusi dialogu ne’ebe mak konsege halo nune’e governu komprende papel jornalista nian importante tebtebes no respeita servisu jornalista ne’ebe maka halo iha instituisaun media sira.
“Hau konsidera governu seidauk respeita papel jornalista, ita hare waihira jornalista halo kobertura iha fatin-fatin no eventu importante sira la konsidera no fo fatin dignu ba jornalista sira atu halo kobertura, no la preokupa jornalista atu hamriik iha loron manas ka iha udan been mos sira la preokupa. Sira preokupa liu ema sira ne’ebe mak sira konvida maibe sira ladun fo konsiderasaun no prioridade ba jornalista sira no hau sente katak governu presija hadia, sa tan ita hatene katak besik eleisaun sira tenke respeita no konsidera fo prioridade ba asuntu media nomos jornalista sira, nia esplika.
Iha seminariu ne’e fahe ba sesaun tolu, primeiru ba jornlista feto hodi koalia sai sira nia esperiensia neebe durante nee halo iha instituisaun media, segundu AJTL konvida mos orador husi partidu politiku sira hodi koalia konaba papel media iha eleisaun neebe sei mai no terseiru konaba independensia editorial neebe mak konvida Prezidente Konsellu Imprensa nomos instituisaun sira seluk atu diskusaun klean ba labele influensia sala redesaun durante eleisaun nian, nia hakotu.(bubun)
