“DEKLARASAUN DE VOTO BANKADA CNRT: POZISAUN BANKADA CNRT NIAN VOTA KONTRA BA APROVASAUN FINAL GLOBAL PROPOSTA OJE 2022”
DILI – Bankada CNRT nia deklarasaun de voto ida ne’e sei fahe ba komponente 2; primeiru, halo observasaun ba lalaok debate proposta Orsamentu Jeral do Estadu tinan 2022, iha kontextu kapasidade jestaun meja no komportamentu husi meja Parlamentu Nasional hasoru Bankada CNRT ho nia deputadu sira, no segundu mak halo observasaun, análize no justifikasaun de pozisaun ba debates Proposta Orsamentu Jeral Estadu tinan fiskal 2022.
Ohin, Bankada CNRT hakarak hato’o lamentasaun kona-ba maneira Prezidente Parlamentu de Faktu ne’ebé jere diskusaun la hare ba proporsionalidade hodi limita Bankada Opozisaun halo intervensaun, hanoin kritikas no hato’o opiniaun dezde debates no aprova proposta OJE 2022. Bankada CNRT hare katak laiha ona respeita ba direitu partidu polítiku sira nian atu halo opozisaun ne’ebé demokrátiku, ka atu simu informasaun regular no direita kona-ba lala’ok asuntu interese nasional nian hanesan konsagra iha artigu 70 husi Konstituisaun-da-Repúblika.
Prezidente Parlamentu de Faktu nia maneira halo jestaun ba diskusaun ne’ebé ho karater autokrasia ka po¬der absoluta hanesan dalan ida atu halo sensura ba deputadu sira husi Bankada CNRT atu labele ko’alia kona-ba asuntu sira ne’ebé liga ba interese nasaun ida ne’e ninian, nune’e halo debate orsamentu ba tinan 2022 hatudu impresaun obriga án, laiha kualidade no la saudável.
Povu Doben Timor-Leste,
Povu hotu-hotu sai sasin ba violasaun direitu deputadus sira nian iha plenária ida ne’e, ho planeadu no arganizadu, Meja Parlamentu Nasional halo ameasas, insultus, intimidasaun no halo diskriminasaun hasoru deputadus sira husi Bankada CNRT.
Tuir Rejimentu Parlamentu Nasional, tuir loloos deputadus sira no Bankada bele halo defeza de honra ba naran di’ak Bankada, no mós ba ninia deputadu sira ne’ebé mak hetan tratamentu ne’ebé la dignu husi deputadu Aniceto durante prosesu debate Proposta Orsamentu Jeral Estadu 2022. Maibé, saída mak akontese? Dala barak insisti atu halo defeza no esplikasaun, deputadu Aniceto la fó fatin, akontese maka deputadu Aniceto orienta debate ne’e hanesan ema barulho iha Mercado, iha Terminal no iha luron-ninin sira, hodi nune’e hamonu tiha imajen ladi’ak ba orgaun soberanu ida ne’e iha públiku. Tanba-ne’e maka Bankada la halo defeza iha loron hira liubá bain-hira deputadus sira hetan tratamentu ne’ebé la dignu, át liután halo insultu no ameasas ba deputadu sira, liu-liu deputadu sira husi bankada CNRT nian katak sei haruka sai husi plenária. Situasaun ida ne’e reflete hahalok asaltu de poder iha loron 19 Maiu 2020 ne’ebé hili PPN de Faktu hanesan hili “ketua kelas” oan ida.
Tanba-ne’e, iha oportunidade ida n’e Bankada CNRT pertende atu halo avaliasaun ba deputadu Aniceto ninia kapasidade atu halo jestaun no mós ninia komportamentu núdar membru orgaun soberanu ida.
Deputadu Aniceto lidera Meja PN rejeita no la admite proposta sira ne’ebé membru Parlamentu Nasional husi CNRT nian submete ho razaun tanba deputadus CNRT konsidera VIII Governo Viabilizadu hanesan Governu Inkonstitusional iha intervensaun, mezmu iha proposta balun ne’ebé deputadus Bankada Governu submete fora do tempo (ezemplu: proposta 152) sira hodi justifika katak Tribunal deklara ona Governu de Faktu ne’e Konstitusionál. Bankada CNRT hakarak kontinua informa ba públiku katak Petisaun ne’ebé CNRT hatama ba Tribunal Rekursu hetan indeferimentu tanba razaun prosesual, Tribunal seidauk hare ba substánsia de matéria husi CNRT nia petisaun. Tanba-ne’e Prezidente Parlamentu de Faktu ne’ebé uza Tribunal nia naran hodi hanehan direitu husi deputadu CNRT nian ne’e laiha fundamentu, bosok públiku, no ida ne’e lamentável tebes.
Povu Doben Timor-Leste,
Mezmu nune’e Bankada CNRT kontinua ativa iha debate, hodi foti pontu importante sira durante debates Proposta OJE 2022. Bankada CNRT observa, halo análize klean no konsidera importante tebes atu públiku presiza hatene oinsá mak governu ida ne’e halo jestaun ba rekursus públiku. Análize no observasaun kritika sira mak hanesan tuir mai ne’e:
1. Governu de Faktu laiha kbiit atu defende Orsamentu ne’ebé aprova ona iha Konsellu Ministru, bain-hira Bankada Aitongka uza podér parlamentár nian hodi impoin no obriga hasa’e tetu orsamentu husi Biliaun $1.7 sa’e to’o Biliaun $2, ka iha aumentu 17%. Orsamentu por programa ne’ebé sai pontu de orgulho ba Xefe Governu de Faktu lakon tiha nia valor, ka nakfilak ba slogan mamuk ida ne’ebé laiha sentidu. Bankada Aitongka obriga aloka orsamentu ba programa ne’ebé Governu rasik la prevee, ka ho sentidu katak, Parlamentu maka elabora orsamentu hodi haruka ba Governu atu ezekuta, mezmu Governu rasik hatene ninia limitasaun ka kapasidade atu ezekuta. Bankada Aitongka hasa’e orsamentu ba Ministeriu sira ne’ebé lidera husi kuadru Partidu Aitongka nian, mezmuké sistema free balance hatudu momoos katak Ministériu sira ne’e laiha kapasidade atu ezekuta Orsamentu Jerál Estadu 2021.
2. Xefe Governu de Faktu lansa retórika katak Orsamentu Jerál Estadu 2022 nia karáter maka orsamentu por programa, maibé realidade Bankada Governu nian hato’o proposta hodi sobu tiha estrutura orsamentu nian. Durante debate Orsamentu Jeral Estadu, Xefe Governu la hatudu nia autoridade, pelu kontráriu fó espasu ba Bankada Governu nian hodi aumenta osan ba tetu orsamentu ne’ebé Governu define tiha ona. Governu no Bankada Governu sira haluha katak tinan oin ne’e núdar tinan polítiku ba partidus polítikus sira hotu atu halo konferénsias no kampaña Eleisaun Prezidente-Repúblika no Eleisaun Parlamentár, nune’e, ladun prudenti bain-hira governu taka matan hodi foti osan barbarak. Atu dehan mós katak Governu rasik kontra ninia polítika atu evita foti osan barak liután, halo poupansa, labele foti liu RSE ka Rendimentu Sustentável Estimadu. CNRT hare katak laiha koordenasaun entre Membru Governu ho Xefe do Governu, tanba maske Xefe do Governu determina tiha ona tetu orsamentu maibé Membru Governu sira kolabora ho deputadu sira hodi kontinua hatama proposta hodi aumenta osan ba ministériu ne’ebe sira lidera, liu-liu aumentu barak liu ba Bankada ida ne’ebé FRETILIN lidera (ezemplu: SEKOOP, MTCI no MAE) mezmu orsamentu sira ne’e atu aloka ba atividade ne’ebe antes ne’e Governu la prevee iha programa Governu nian rasik.
3. Governu de Faktu nia kapasidade ezekusaun Real ba Orsamentu Jeral Estadu 2021 to’o fin do ano ezekusaun maka iha de’it Biliaun $1.2 ka 59% maibé kontinua husu osan bo’ot, pior liután, Bankada Governu mós hatama nia interese polítika hodi aumenta tán montante orsamentu. Iha indikasaun momoos katak mosu dualizmu iha governasaun ida ne’e, hanesan karreta ida karik, Governu ida ne’e iha kondutór na’in-rua, kondutór-ida tuur iha volante enkuantu kondutór-ida seluk dulas volante husi li’ur, tanba ne’e maka proposta Orsamentu Jerál Estadu 2022 hanesan tiha borraxa ne’ebé bele dada naruk ba nafatin tuir orientasaun husi kondutór husi li’ur ne’ebé lolo liman ba karreta nia volante.
4. Ministériu Finansa deklara iha plenária ida ne’e katak, laiha korrelasaun entre ezekusaun orsamentu jerál estadu ba kreximentu ekonómika, deklarasaun ne’ebé hatudu momoos Sr. Ministru nia ignoránsia. Kreximentu ekonómika iha ligasaun metin ho atividade ekonómika, no atividade ekonómika maka rezulta kreximentu ekonómika. Tanba-ne’e maka importante tebes atu hasae kapasidade ezekusaun tanba ita hotu hatene katak, ekonomia Timor-Leste depende ba ezekusaun Orsamentu Jerál Estadu nian.
5. Ministru Ordenamentu Territoriál deklara iha Parlamentu Nasionál katak ezekusaun orsamentu 2021 ne’ebé fraku ne’e sei kontinua ba tinan 2022 ho razaun katak Ministériu sei halo estudu antes ezekuta orsamentu. Enkuantu Timor-Leste presiza implementasaun projetu infraestrutura sira atu kria kondisaun ba atividade ekonómika, inklui sai fonte ba kriasaun empregu maske ba kurtu prazu, maibé Ministériu ne’ebé lidera Komisaun Administrasaun Fundu Infraestrutura deklara katak sei estuda lai. Iha nasaun barak ne’ebé afeta husi Covid-19, Governu foti desizaun kria no hasa’e fundu infraestrutura atu bele estimula atividade dezenvolvimentu nune’e bele provoka kreximentu, maibé iha Timor-Leste, Governu aperta fali sintu hodi trava projetu infraestrutura ne’ebé rezulta laiha sirkulasaun osan iha baze, nune’e laiha atividade ekonómika no kreximentu kontinua ki’ik ka negativu.
6. Xefe Governu rasik iha ninia intervensaun deklara katak, bain-hira Governu kontinua foti osan liu RSE maka sei fó ameasa ba sustentabilidade Fundu Petrolíferu, maibé realidade Governu la aprezenta polítika oinsá atu asegura sustentabilidade Fundu Petrolíferu nian, foti osan liu RSE sein iha esplikasaun detailhas kona-ba interese longo prazu Timor-Leste tuir Lei Fundu Petrolíferu haruka. Hahú kedas iha tinan 2007 Bankada FRETILIN sempre protesta katak to’o 2022 Fundu Petróleu sei mamuk, maibé Governu ne’ebé lidera husi Maun Bo’ot kay Rala Xanana Gusmão foti desizaun halo aliterasaun ba Lei Fundu Petrolíferu ne’ebé loke espasu ba investimentu ativus. Rezultadu husi aliterasaun Lei Fundu Petrolíferu ne’ebé Bankada FRETILIN walk-out maka to’o ohin loron fó ona aumenta ba Fundu Petróleu ho total besik Biliaun $9. Kestaun maka ne’e, Governu de Faktu nia polítika atu asegura sustentabilidade Fundu Petróleu nian maka saída lós?
7. Iha Governu AMP ne’ebé CNRT hola parte, Governu hakarak aselera dezenvolvimentu no esplorasaun Kampu Greater Sunrise nune’e iha tinan 2026 osan husi Kampu Greater Sunrise mós bele tama ona ba Fundu Petrolíferu hodi asegura no halo bo’ot liután Fundu ida ne’e. Maibé Governu de Faktu ne’ebé moris liuhosi dalan asaltu ba podér to’o oras ne’e la hatudu vontade atu halo esplorasaun ba Kampu Greater Sunrise, enkuantu nasaun bo’ot sira hahú ona lansa polítika zero carbon emission ka emisaun zero ba karbonu iha tinan 2030. Sé Timor-Leste la esplora Kampu Greater Sunrise antes 2030 maka Timor-Leste sei hasoru difikuldade ba polítika global zero emission ne’ebé nasaun bo’ot sira hakarak atinje. Saída maka Governu de Faktu nia planu atu asegura sustentabilidade Fundu Petrolíferu nian bain-hira la tau prioridade ba esplorasaun Kampu Greater Sunrise iha tempu besik nia laran? Laiha resposta durante diskusaun OJE 2022.
8. Bankada Governu muda osan husi Kapitál Dezenvolvimentu ba fali Transferénsia Públiku ho razaun atu fasilita ezekusaun, maibé intensaun loloos maka atu fahe osan. Mudansa sira ne’e sei difikulta Parlamentu Nasionál no Camara de Contas atu halo check and balance no sei loke dalan ba prátika mal jestaun, korrupsaun, koluzaun, no nepotizmu.
9. Bankada CNRT preokupa ho faktu katak Autoridade RAEOA la pronunsia númeru konta bankária ne’ebé uza hodi depozita estadu nia osan por volta Millaun $300, át liután iha relatóriu ne’ebé hato’o husi Autoridade RAEOA katak osan ne’ebé depozita iha Banku ne’e laiha juros ka funan. Ida ne’e preokupante tanba laiha banku ida maka la fó juros ba nia kliente, no Bankada CNRT hakarak públiku atu hatene sé los maka hetan ka goza juros ka funan husi estadu nia osan ne’ebe depozita iha Banku, maibé Prezidente Parlamentu la fó tempu ba deputadu CNRT atu kestiona asuntu pertinente sira ne’e. Aleinde asuntu ida ne’e, CNRT mós preokupa ho alokasaun Millaun $14 atu finaliza konstrusaun ferry Haksolok ne’ebé uza fali ba sosa asaun kompañia Atlantic Eagle ne’ebé bankarrota tiha ona. Ikus mai, mosu tan informasaun katak, Autoridade RAEOA uza osan estadu nian atu co-parseria ho kompañia lokál atu sosa fali ferry Success, Bankada CNRT hakarak kestiona asuntu sira ne’e maibé Prezidente Parlamentu de Faktu la fó tempu atu halo intervensaun.
10. Bankada CNRT observa katak deputadu husi Bankada Governu sira hadau malu orsamentu, ho sentidu katak ba proposta sira ne’ebé hato’o husi Bankada FRETILIN admite no hetan aprovasaun mezmu la tama iha programa governu nian. Ezemplu klaru maka alokasaun Millaun $40 ba SEKOOP ba sesta bázika ne’ebé Governu la prevee iha programa, ho razaun governu nian katak Timor-Leste la’ós ona iha períodu emerjénsia no laiha lei atu bele ezekuta programa ida ne’e, maibé Bankada FRETILIN obriga tau osan Millaun $40. Enkuantu ba Ministériu Sosiál Solidariedade no Inkluzaun ne’ebé lidera husi Ministra KHUNTO nian, maske iha programa ba subsídiu idozu nian no iha proposta atu hasa’e osan subsídiu husi $30 sae ba $50, Bankada FRETILIN vota kontra tiha.
Ho razaun sira ne’e hotu maka Bankada CNRT VOTA KONTRA Proposta OJE 2022 ida ne’e.
Povu Doben Timor-Leste,
Bankada CNRT hakarak halo lós tiha propaganda falsu sira ne’ebé lansa iha Parlamentu Nasionál katak anteriórmente saldu tranzitadu to’o Millaun $700, ida ne’e laloos tanba tuir relatóriu conta geral do estado husi tinan 2013 to’o 2020 seidauk rejista saldu tranzitadu to’o valor hanesan lansa husi deputadus bankada Governu nian. Bankada opozisaun la hetan oportunidade atu hato’o opiniaun durante debate proposta Orsamentu Jerál Estadu 2022 tanba hetan sensura husi Prezidente Parlamentu de Faktu. Povu Timor-Leste tomak akompaña oinsá Prezidente Parlamentu de Faktu halo deklarasaun ne’ebé indika kedas ba pratika ilísitu, Prezidente Parlamentu Nasionál deklara katak Ministériu halo ona kontratu ho kompañia no aprova ona iha Konsellu Ministru no hein de’it ona Parlamentu Nasionál atu aprova orsamentu ba kontratu refere. Ida ne’e maka realidade ne’ebé akontese, no razaun sira ne’e maka dudu Deputadu sira halo proposta hodi hasa’e orsamentu ba Ministériu sira maske Governu determina tiha ona tetu orsamentu antes lori mai Parlamentu Nasionál.
Atu termina, Bankada CNRT husu ba Governu de Faktu atu labele kontinua bosok povu katak Covid-19 maka impede dezenvolvimentu. Tanba realidade nasaun viziñu Indonezia ne’ebe afeta makas husi Covid-19 no hamate ema barak maibé dezenvolvimentu fíziku iha nasaun refere kontinua la’o. Ita hotu asiste oinsá prezidente Indonezia nian halo inaugurasaun ba projetu infraestrutura hanesan irrigasaun, estrada, ponte, no projetu infraestrutura sira seluk, maibé iha Timor-Leste ne’ebe númeru Covid-19 tun ka sa’e depende ba Governu, maibé uza fali ba razaun atu la halo dezenvolviementu. Tinan-rua nia laran Timor-Leste moris iha situasaun estadu emerjénsia nia laran tanba Covid-19, Bankada CNRT preokupa ho situasaun atuál ne’ebe Governu de Faktu loke livre hela fronteira terrestre, tanba variante Omicron oras ne’e hahú buras iha Indonezia, keta halo hafoin ita aprova tiha Orsamentu Jeral Estadu 2022, ita tama hikas fali ba Esatdu Emerjensia nune’e bele sai razaun ba Governu atu la halo dezenvolvimentu.
Bankada CNRT bolu atensaun ba Ministériu Públiku, CAC, Sosiedade Sivil no media atu tau matan ba orsamentu ida ne’e.
Fiar Án La’o Ba Oin – FALBO!
Obrigado.
Duarte Nunes, Presidente da Bancada CNRT
#REMATA.
