Sunu Uma 5 Iha Hera, PNTL Kaptura Aútor Na’in 8
Timoroman.com-Deskonfia konfrontasaun entre Grupu Arte Marsiais (GAM) ne’ebé akontese iha parte Hera (07/11) rejulta uma lima (5) hetan sunu, vitima nain tolu hetan kanek.
Hafoin akontesimentu ida ne’e, Polisia Nasional Timor Leste (PNTL) kaptura ona autor na’in 8 ne’ebe mak deskonfia involve a’an iha GAM.
Kazu asaltu malu ne’e deskonfia iha involvimentu GAM, ne’e duni parte seguransa PNTL nian halo kedas atuasaun no konsege kaptura ona autor nain 8 hodi nune’e bele lori ba prosesu investigasaun.
“Uma lima mak hetan sunu, motorizada tolu mak hetan estragus no rezulta vitima nain tolu kanek todan tanba deskonfia husi GAM mak halo asaun.” dehan Komandante Opersaun PNTL, Superintendenti Xefi, Henrique da Costa ba Jornalista sira iha ninia kna’ar fatin Kurtel Jeral PNTL Kaikoli, Tersa-Feira (08/11).
Molok akontesimentu ida ne’e, iha loron (05/11) komesa komesa provoka malu no ninia kontinuasaun mak akontese to’o asaltu malu iha loron (07/11) ne’eb’e rejulta uma lima hetan sunu.
Kazu ne’e tuir loloos atu resolve iha suku, maibé mosu ona problema bo’ot entaun husi vitima entrega ba PNTL hodi halo prosesu investigasaun.
“Agora daudauk kazu ne’e iha hela prosesu nia laran, tanba ne’e mak ita fo tempu ba polisia investigasaun nian atu bele halo invetigasaun ne’eb’e klaen hodi nune’e bele hatene loloos motivu husi problema ida ne’e.”tenik komandante Henrique.
Tuir informasaun ne’ebé parte PNTL hetan katak, iha kazu asaltu ne’e involve mós suspeitu balun ne’ebé mak bolu husi fatin seluk.
“ita konsege kaptura ona autor ba kazu ne’e hamutuk nain 8 no espera katak liu husi prosesu invetigasaun bele indentifika tan autor balun ne’ebe mak sei livre hela iha liur, maibé ida ne’e depenede ba Ministeriu Publik (MP) hodi halo karta mandadu kapturasaun.” deklara Komandante Opersaun.
Bainhira iha ona karta mandadu kapturasaun konserteza PNTL sei kontinua halo opersaun ba autor ne’ebe mak involve iha kazu ne’e, inklui autor prinsipal ba kazu refere.
“agora daudaun situasaun iha parte hera nian kontroladu tanba iha akontesementu ne’e Forsa Rezerva nomós Unidade Espesial Polisia (UEP), liu-liu Bataliauns Orden Publiku (BOP) ba halo kedas atuasaun ne’ebe agora situasaun normal hela.” esplika Henrique (anu)
