‘Assanami’ Husu Deskulpa Ba Vitima Raikotu
DILI (Timoroman) – Prezidente Partidu Demokratika (PD), Mariano ‘Assanami’ Sabino, hato’o ninia solidariedade no husu deskulpa, ba komunidade iha Aldeia Terra Santa, Raikotu, Comoro.
“Ha’u mai iha ne’e (Raikotu, red.), hanesan solidariedade ba komunidade sira ne’ebé sai vitima mal-prátika hosi partidu nia lala’ok. Nu’udar Prezidente Partidu Demokratika, ha’u mós husu deskulpa ba vitima sira, atu bele garante liberdade no hakmatek ba povu,” dehan Assanami ba jornalista, Kuarta (08/03) hafoin halo vizita ba uma hirak ne’ebé hetan estragus iha Aldeia Terra Santa, Raikotu, Suku Comoro.
Tuir Assanami, prinsipiu fundamental hosi demokrasia maka tenke kria estabilidade no pás. Tan ne’e, nia dehan, la merese ona atu hasai lia fuan sira ne’ebé la presiza atu hasai. “Tempu to’o ona atu ita tuur hamutuk, la’o ba oin iha sistema multi partidu,” nia hatete tan.
Hatán ba perguntas, kona-ba responsabilidade ba sasán hirak ne’ebé hetan estragus, Assanami dehan, eleisaun ida ne’e selebra hosi Governu. Tan ne’e, Governu mak iha responsabilidade ba sasán hirak ne’e.
“Nu’udar partidu, ami sei haree de’it katak iha Sábadu ka Domingo oin mai, sei iha joven balun hosi bairo ida ne’e mak halibur hamutuk, para depois bele fó sira-nia solidariedade atu haree saida mak sira bele halo ba janela, odamatan no buat seluk tan,” Assanami esplika.
Maski nune’e, tuir prezidente PD ne’e, labele estraga evidensia. Prosesu investigasaun mós tenke remata. Atu nune’e, prosesu investigasaun bele la’o ho di’ak. “Partidu husu para investiga loloos. Ho ida ne’e, ita bele respeita povu ida ne’e,” nia dehan.
Iha fatin hanesan, vitima Domingos Dos Neves konta, bainhira problema nee akoñtese nia la hatene. Tanba, nia toba dukur hela. “La kleur, hau rona ema hakilar. Ha’u mós sai atu ba haree, maibé dalan metin ona. Ne’ebé, rezultadu hosi akoñtesementu ne’e, ha’u nia vidru janela oin no kotuk rahun. Kalen uma mós kuak tanba hetan tuda,” Domingos konta tuir.
“Bainhira akoñtesementu ne’e akoñtese, polísia sira haree de’it masa ne’ebé mak tuda no sobu ami nia uma. Sorte iha momentu ne’ebá, iha membru Polísia Militár (PM) hosi F-FDTL mak bele atua situasaun, hodi masa bele hapara sira-nia hahalok ne’e,” tenik vitima Roza Gomes. (sal)
