Henrique Apresia Servisu Membru UPF
Timoroman.com-Komandante Opersaun Polisia Nasional Timor Leste (PNTL), Superintendenti Xefi, Henrique da Costa apresia tebes ho serbisu membru Unidade Polisia Fronteira (UPF) ne’ebé ho esforsu a’an tomak hodi kontrola sasan illegal ne’ebé tama sai lina fronteira.
“sasan ilegal barak mak tama liu husi fronteira, maibé liu husi servisu membru UPF nia iha fronteira konsege prende sasan illegal balun, inklui kilat manu nian balun. ” dehan Superintendenti Xefi, Henrique da Costa iha Kuartel Jeral PNTL Kaikoli foin lalais.
Komandante Operasaun espera katak, hahú agora ba oin membru UPF sira bele esforsu a’an diak liu tan hodi bele fó seguransa masimu ba situasaun iha fronteira, atu nune’e bele kontrola nafatin sasan illegal ne’ebe mak tama sai.
“ita hatene fronteira ne’e nia area luan no rekursu membru UPF mós limitadu entaun membru UPF labele atu kontrolu fatin hotu, ita mós konfiansa ba polisia intelejensia sira hodi bele kolabora hamutuk hodi fahe informasaun atu nune’e bele kaptura ema ne’ebe hatama sasan illegal.” tenik Henrique.
Nia dehan,la’os polisia de’it mak servisu, maibe presiza kontribuisaun husi komunidade ne’ebé mak hela besik iha fronteira atu bele servisu hamutuk hodi fahe informasaun ba parte polisia.
Dala ruma sasan illegal sira ne’e bele liu husi tasi, tanba hare ba membru Unidade Polisia Maritima (UPM) ne’ebe mak limitadu tebes, entaun defisl tebes atu halo kontrolu kobre iha tasi.
“tinan ida ne’e ka tinan oin mós seidauk bele halo rekrutamentu ba membru Polisia foun, tanba persiza orsamentu ne’ebe mak bo’ot hodi bele prepara fatin nomos treinamentu no seluk-seluk tan.” tenik Komandante ne’e.
Iha biban ida ne’e, Komandante Operasional informa katak, prosesu investigasaun ba ema sira ne’ebé mak hatama kilat manu nian no polisia sira prende ne’e agora daudauk ninia prosesu la’o hela. (anu)
