Emilia La Marka Prezensa, Tribunal Konsidera Arguida Komete Krimi Dezovendensia
Timoroman.Com – Tribunal Distrital Dili (TDD) konsidera Arguida Emilia Pires (eis Ministra Finansas) komete krimi dezovendensia tuir Artigu 244 kodiku prosesu penal Timor-Leste nian, tanba Arguida viola Lei no la kumpri desizaun Tribunal.
Sesta Feira, (4/11/2016) Tribunal Distrital Dili hala’o julgamentu kontinuasaun ba arguida, Emilia Pires. Prosesu julgamentu ne’e ho objetivu atu rona deklarasaun ikus husi arguida Emilia Pires no husu arguida atu entrega ninia pasaporte, maibé to’o data ne’ebé determina arguida la entrega ninia pasaporte no kontinua la marka prezensa iha tribunal.
Antes ne’e Tribunal Distrital Dili fo prazu loron lima ba arguida atu entrega ninia pasaporte ba Tribunal, maibé sekarik iha loron lima nia laran mak arguida la hatama entaun arguida sei hetan fali konsekunsia seluk.
Prosesu julgamentu ba kazu ida ne’e la’o tarde tanba arguida Emilia Pires hatama pedidu ba Tribunal ho razaun oin-oin no ninia implikasaun halo prosesu ne’e demora. Ho razaun ne’e Tribunal aplika tan medida foun katak, arguida komete tan krimi Dezovedensia tuir Artigu 244 kodilu prosesu Penal Timor Leste nian.
Arguida viola ona Lei tanba la kumpri desizaun husi Tribunal no arguida la entrega pasaporte ba Tribunal, pior liu tan arguida sai ba liur sein hetan autorizasaun husi Tribunal.
Juiz Jose Maria de Aroujo ne’ebé kaer prosesu ne’e hateten, Tribunal simu tan pedidu eskrita ida husi arguida, Emilia Pires. Pedidu ne’e hatama liu husi defeza arguida nian no iha pedidiu eskrita ne’e hateten, posibilidade arguida sei hala’o oprerasaun ba nia ain, tanba arguida sofre hela moras Emologia.
“Tribunal konsidera arguida ignora ona Artigu 135 pontu 2 kodigu prosesu penal, ne’e duni husu arguida atu hato’o ona dokumentus legalizadu ba tribunal ho relatoriu mediku nomós marka data foun ba arguida.” dehan Juis Jose Maria de Aroujo, Sesta-Feira (04/11)
Entertantu husi parte Ministeriu Publiku (MP) husu ba Tribunal atu altera medida koasaun ne’ebe tribunal aplika ba arguida no husu Tribunal atu aplika medida kapturasaun ba arguida, tanba maneira ne’ebe arguida hatudu atu desfia Tribunal no arguida halimar ona ho Tribunal tanba hakarak halai ses husi prosesu julgamentu.
Responde ba kestaun ne’e, Jose Pedro Camões nu’udar defeza husi arguida Emilia Pires hateten, arguida nia kondisaun saude la di’ak tanba sofre moras Emologia no tuir razaun fundamentu husi junta mediku ne’ebe hato’o liu husi karta eskrita katak ohin (5/11) arguida sei hala’o operasaun ba nia ain maibe buat hotu sei la’o ho diak, tanba iha loron (11/11)) arguida bele fila ona mai Timor Leste no arguida imediata atu rona desizaun husi Tribunal.
Hafoin rona tiha deklarasaun husi parte rua, Tribunal deside adia fali prosesu julgamentu ba (16/11) oras tuku 16: 00 loraik. Audensia Julgamentu ne’e prezidi husi juiz koletivu, José Maria de Aroújo, Francisca Cabral no Maria Solana Fernandes, parte Ministeriu Publiku reprezenta husi Prokuradora, Angelina Saldanha, Jacinto Babo no Lidia Soares no husi parte defeza arguida Emilia Pires nian Advogadu Pedro Camões nomós defeza husi parte arguida Madalena Hanjam nian advogadu José Guterres. (MJ5)
