Koligasaun ‘Nakfera’ Fretilin Mantein Forma Governu
TIMOROMAN.COM-Koligasaun entre partidu FRETILIN, PD , KHUNTO ‘Nakfera’ tan de’it Khunto, Kuarta (13/9) horseik, la marka prezensa iha asina akordu koligasaun.
Maiske, partidu Khunto desidi retira husi koligasaun, maibe pozisaun Fretilin mantein nafatin la’o hamatuk ho PD, liu husi asina akordu koligasaun forma VII Governu Konstituisional.
Iha konferensia imprensa Sekretariu Jeral Frente Revolusionariu Timor Leste Independente (FRETILIN) Mari Bim Amude Alkatiri, hateten razaun Partidu Khunto la mai asina akordu koligasaun tanba sira iha problema interna seidauk rejolve.
“Ami mos labele hein ona, tan ne’e Fretilin no PD disidi ona atu lao ba oin, ita komprende problema sira seluk nian, maibe la bele demora ona, tanba tempu to ona atu forma VII Governu atu toma posse,” deklara Mari iha Comete Central Fretilin, horseik.
Lideransa Fretilin ne’e dehan , PD desde hahu inisiu halo konfersasaun sempre dehan prontu atu lao hamutuk, la muda no ohin atu asina akordu. Nune’e mos Governu ida ne’e atu prepara mos kondisaun ba jerasaun foun atu hatutan sakrifisiu ema hotu nian.
Fain hanesan Prezidente Partidu Demokratiku (PD), Mariano Asanami Sabino, deklara tempu ona atu bele asina akordu ne’ebe mak iha. Tanba PD ninia pozisaun nafatin konsisten para depois ukun ida hodi serve Timor oan no dinifika Timor ona tomak, atu nune’e la bele iha tan diskriminasaun ba Timor oan hotu-hotu .
Hafoin de remata asina akordu Lideransa masimu Fretilin, Mari Alkatiri no PD Mariano Assanami Sabino, direitamente hasoru Prezidente Republika, (PR ) Francisco Guterres ‘Lu Olo’, iha Palasiu Presidensial Bairo –Pite, hodi informa kona ba rejultadu koligasaun.
“Ami mai relata ba Prezidente Republika Lú-Olo kona ba partidu ne’ebé mak halo kolegasaun hodi bele forma VII Governu Konstituisional, maibé partidu KHUNTO rasik la marka prezensa,” katak Mari ba Jornalista, baihira remata sorumutu ho PR Lu Olo.
Mari haktuir, PR Lú Olo hakarak semana ida nia laran ne’e tenke forma ona VII Governu Konstituisional.
“FRETILIN hó PD iha profesionalidade barak, balun iha duni ne’ebé mak hanesan ema FRETILIN balun ba iha partidu CNRT ne’e mós bele akontese,” subliña Mari.
Ulun bo’ot Fretilin ne’e dehan, kona ba hametin estabilidade mak tenke halo dialogu hó partidu sira seluk, hodi bele vota ba programa, bainhira vota kontra mak lakonkorda ba programa hirak ne’e mak tenta halo akordu uluk.
Aliende ne’e mos Konselleiru Masimu Partidu KHUNTO, Jose dos Santos ‘Naimori’, hasoru malu ho PR Lu Olo, iha palasiu Presidensial Nicolau Lobato.
Naimori hateten, KHUNTO respeita konvite Prezidente Republika (PR), L¬ú OLo nia hanoin ba hotu partidu hotu tenke iha unidade nasional.
“Ami nia prezensa atu bele rona lia menon husi PR Lú Olo, atu nune’e bele kria estabilidade ba nasaun Timor Leste,” realsa nia.
Hatan ba pergunta KHUNTO la marka prezensa iha asina akordu koligasaun, Naimori dehan , sira sedauk bele fó sai razaun tansa la marka prezensa iha asina akordu hó partidu FRETILIN, maibe aban (ohin ) mak sira foin bele fó sai ba publiku. (Anu/sal)
