Melio Konsidera Resposta PR Ilegal
TIMOROMAN.COM– Jurista timor oan Melio konsidera karta respota ne’ebe hato’o husi Prezidente Republika (PR) Francisco Guterres ‘Lu Olo’ ba nia (Melio red) liu husi sekretaria ezekutivu PR hanesan ilegal.
“PR Lu Olo fo’o ona resposta mai hau kona ba karta somasaun ne’ebe hau hato’o ba, maibe resposta ida ne’e la’os PR maka fo resposta, maibe liu husi sekretaria ezekutivu” dehan Melio ba jornalista, bainhira intrega karta reklamasaun ba PDHJ iha Kaikoli, Sesta (06/10).
Tuir Melio katak, Sekretaria ezekutivu laiha ligasaun, karik PR delega sekretaria ezekutivu atu responde karta tenke iha baze legal ruman.
Baze legal saida maka iha, la hare iha karta ne’e nia laran no laiha lia fuan ruma katak PR fo ba iha sekretaria ezekutivu maka sei reprezenta PR hodi responde mai nia karta.
“Hau nafatin konsidera karta ne’ebe PR fo husi sekretaria ne’e ilegal” afirma Melio.
Hanesan jurista timoroan la satisfaz, ne’e duni prosesu kontinua nafatin to ba iha nia rohan, roha maka tribunal rekursu.
Nia mos husu ba publiku no sosiedade hotu no ba maluk sira ne’ebe iha intensaun atu salva guarda konstituisaun mai hamutuk akompaña prosesu ne’ebe lao hela to iha tribunal oinsa.
Melio Entrega Karta Reklamsaun ba PDHJ
La satisfas ho desizaun PR Lu Olo nomeia Mari Alkatiri ba Primeiru Ministru viola Konstituisional RDTL, Jurista Melio de Jesus, Sesta (06/10) horseik, maisjumenus tuku 10:00 Otl, hakat direitamente ba edifisiu PDHJ hodi intrega karta reklamasaun ba Provedor direitu Humanus Justisa (PDHJ).
“Hau mai hato’o hau nia karta reklamasaun inkonstituisionalidade ba PDHJ kontinua husi karta somasaun ne’ebe hau hato’o ba PR Lu Olo,” informa Melio.
Nia hateten, pedidu husi karta ne’e nafatin mantein dalan atu ba tribunal, tanba PDHJ maka iha kompetensia tuir artigu 27 atu bele hato’o ba iha supremu tribunal justisa kona ba lalaok inkonstituisional ne’ebe iha.
Melio mos relata kona ba pedidu refere husu reklamasaun inkonstituisionalidade ba iha tribunal supremu atu tesi kona ba violasaun konstitusional ne’ebe halo liu husi Prezidente nia dekretu iha artigu 106 konstituisaun Republika ligasuan ba formasaun Governu ba nomeasaun Primeiru Ministru Mari Alkatiri. (Kid)
