GPM Aprezenta Rezultadu PED ba KM
DILI (Timoroman) – Gabinete Primeiru Ministru (GPM), Tersa (07/03) aprezenta avaliasaun ba implementasaun primeira faze Planu Estratéjiku Dezenvolvimentu Nasionál (PEDN) tinan 2011-2015 iha Konsellu Ministru (KM).
“Ho ida ne’e, ita bele akompaña evaluasaun implementasaun Planu Estratéjiku Dezenvolvimentu Nasionál (PEDN),” hatete Sekretariu Estadu Konsellu Ministru (SEKM) Avelino Coelho ba jornalista, hafoin remata KM parte dadeer nian, iha Palasiu Governu, Dili, Tersa (07/03).
Avelino dehan, ida ne’e hanesan halo avaliasaun de’it ba iha liña Ministerial hotu-hotu, atu transporta vizaun ho metas iha planu ba iha programa tinan-tinan nian. Liuliu avaliasaun ne’ebe mak halo ona no tanba sa mak seidauk halo.
“Tanba, PEDN ne’e to’o iha tinan 2030. Agora ita foin komesa husi tinan 2011 to 2015. Halo tiha avaliasaun, mak ita haree ba oin ne’e halo nusa,” Avelino esplika. (sal)
