Polisia Bandu Fa’an Fugetis
Timoroman.com-Komandu Polisia Nasional Timor-Leste (PNTL) liu husi Komandante Jeral, Komisariu Julio da Costa Hórnay bandu labele fa’an Fugetis iha loza-loza tanba seidauk to’o nia tempu.
Husu ba komunidade tomak, liu-liu negosiante sira, tantu negosiante husi rai liur no rai laran atu labele fa’an fugetis iha loja antes tama iha Natal.
“Kuaze fatin-fatin iha Dili laran ema komesa sunu fugetis hodi halo barullu, ne’e duni husu ba negosiante sira labele fa’an fugetis.” dehan Komisariu PNTL, Julio da Costa Hórnay ba Jornalista iha Kuartel Jeral PNTL Kaikoli, Segunda-Feira (14/11).
Polisia sei halo kontrolu ba loja sira ne’ebé fa’an fugetis no bainhira deteta kuandu iha loja balun mak kontinua fa’an fugetis polisia tenke prende hotu hodi lori ba prosesu, tanba seidauk tempu atu fa’an sasan sira ne’e no pior liu tan halo komunidade balun hakfodak.
“Ha’u mós hasai ona ordem ba iha Komandante PNTL Munisipiu Dili atu pasa revista ba negosiante no komunidade ne’ebé mak fa’an fugetis iha loja, ne’e duni kuandu hetan sei prende hotu. ” informa Hornay
Nia haktuir agora falta deit konsiensia husi Timor oan sira, liu-liu ba negosiante sira ne’ebé mak fa’an fugetis. Parte komandu PNTL mós husu ba Alfandega atu halo pasa revista ba sasan ne’ebé mak tama sai lina fronteira nomós Portu Dili ne’e duni bainhira hetan ema ruma hatama sasan hirak ne’e tenke prende hotu.(anu)
