Desizaun Ko’a Salariu Bazeia Ba Lei, Cezar: “Tenke Fó Justifikasaun”
Timoroman.com-Desizaun ko’a ka hatun salariu matebian Ajente, Paul da Costa (membru PNTL vitima krize 2006) daudauk ne’e sai polemika, tanba parte familia la konkorda ho desizaun Ministeriu Solidaridade Sosial (MSS) ne’ebé ko’a matebian Ajente Paul nia salariu.
Mesmu parte familia la konkorda ho desizaun ida ne’e, maibé tuir Xefi Departamentu Benefisiariu Rejime Kontribuisaun, Nelson do Santos hateten, desizaun Ministeriu Solidaridade Sosial hodi ko’a salariu ne’e tuir kriteriu no lei no 6/2012.
Nelson haktuir, Ministeriu Solidariedade Sosial la’os ko’a ema nia salariu arbiru de’it, maibé desizaun ne’e tuir kriteria husi Ministeriu Solidariedade Sosial.
Ministeriu hatene, agora faluk ne’e la simu, maibé oan sira sei kontinua simu salariu ho valor U$ 172,54 centavos.
“Ita hare lolos ba lei ne’e, tanba bainhira laen ka fen mak mate entaun oan sira iha direitu atu simu pensaun, maibe pensaun la hanesan salariu ne’e duni tenke ko’a tanba nia mate ona.
Faluk simu ona pensaun idozos nian, entaun nia labele simu ona pensaun kona ba laen nia mate ne’e, maibe Governo liu husi MSS mos tenke hare ba oan sira to’o nia idade liu tinan 17 mak foin para no ida ne’e haktuir iha lei.
Entretantu, Reprezentante povu iha uma fukun PN, Deputadu Cesár Valente mós lamenta bainhira sira halo transferensia ba Ministeriu Solidaridade Sosial mak responsabiliza kestaun ne’e.
“Ministeriu Sosial tenke fó justifikasaun ba familia vitima sira, tanba saida mak tenke ko’a fali salariu.” tenik Cesar
Deputadu Cesár haktuir, ema sira ne’ebé mate iha krize 2006 iha dekretu ne’e balun mak dekreta sira atu bele hetan direitu husi Estadu, tanba sira lakon vida hodi defende interese nasional.
Nune’e mós, Deputadu Bankada Frente Mudansa, Jorge Teme konsidera problema ida ne’e hanesan problema tekniku la’os problema polítiku, tanba ne’e Ministeriu Solidaridade Sosial ho Ministériu Finansas tenke resolve kestaun ne’e.
“ministériu sira ne’e dala ruma atu rezolve problema ki’ik ida mós lori tempu. Ita nia maluk sira ne’e mate tanba defende interese rai ne’e, mais ita halimar fali ho ida ne’e.”kestiona Deputadu Jorge Teme.
Deputadu Bankada PD, Virgilio Hornai hateten, sira ne’ebé sei ativu simu salariu 100% tanba sira halo hela dezempeñamentu, maibé sira ne’ebé laiha ona kategoria hanesan reforma simu de’it 75% husi sira nia salariu.
“Mais sira mate tanba krize nasional, sira nia direitu nafatin atu hetan ba sira nia oan hó minoridade tinan 17 mai kraik ka sira nia feen mak iha direitu ba simu pensaun ba sobreviventes.” esplika Deputadu Virgilio Hornai.
Virgilio dehan, nia rasik seidauk hatene kuantidade husi orsamentu ne’e hira..? mais diferente hó ninia salariu efetivu, katak salariu ida nia simu 100 % la iha ona.(jax/Cin)
