Oknum F-FDTL Tiru Eskuadra PNTL, Renan “ Husu Ba Komandu Hasai Tiha”
Timoroman.com– Sabadu semana kotuk oknum membru FALINTIL-Forsa Defeza Timor Leste (F-FDTL) ho inisial BT tenta halo infiltrasaun hodi tiru kilat ameasa membru Polisia Nasional Timor Leste (PNTL) iha Postu Administrativu Lospalos, Munisipiu Lautem.
Aktu ne’ebé komete husi membru F-FDTL ho inisial BT ne’e halo komunidade sira ne’ebé hela besik iha area eskuadra PNTL Lospalos hakfodak bainhira rona kilat tarutu iha eskuadra laran.
Bazeia ba informasaun ne’ebé Jornal ne’e asesu katak, oknum membru F-FDTL ne’e lori kilat ho marka FNC no tenta atu tiru membru PNTL ida, maibé la konsege tanba membru PNTL baku oknum membru F-FDTL ne’e nia liman entaun nia tiru sa’e tiha ba plafon.
Tuir kronolojia iha Sesta-Feira, (28/10) kalan maizu menus tuku 23 : 45 Otl oknum membru F-FDTL BT nia alin nu’udar mós membru F-FDTL ida lori motor halo barullu iha vila laran entaun membru PNTL duni no prende ninia motor tanba viola kodiku Estrada.
Hafoin ida ne’e, iha loron (29/10) maizu menus tuku 16: 30 Otl lokraik bainhira prosesu kontajen ba eleisaun lideransa suku nian sei la’o hela derepente rona kilat tarutu iha eskuadra PNTL Postu Lospalos nian entaun halo komunidade sira ne’ebé asiste hela prosesu kontajen hakfodak no balun paniku.
Relasiona ho aktu ida ne’e, Prezidente Konselu Veteranus Munisipiu Lautem, Renan Selak kondena makas atetudi oknum membru F-FDTL ne’e no nia parte husu ba Komandu F-FDTL atu hola medidas forte hasoru oknum refere.
“se ha’u mak iha Komandante nia fatin, membru ne’e ha’u hasai husi forsa, tanba atetudi oknum membru F-FDTL ne’e bebeik ona.”dehan Renan Senak bainhira fó intervista ba RTL foin lalais.
Entertantu Komandante Jeral Polisia Nasional Timor Leste (PNTL) Komisariu, Julio da Costa Horanay hateten, nia parte rona katak oknum membru F-FDTL ameasa atu tiru komandante eskudra PNTL Lospalos nian.
“Loos duni problema ne’e akontese iha Postu Administrativu Lospalos Munisipiu Lautem oknum membru F-FDTL ida tiru kilat halo tauk membru PNTL.” eskarese Komisariu PNTL, Julio da Costa Hornay ba Jornalista bainhira fahe motorizada ba OPS no Tranzitu iha kuartel Jeral PNTL Kaikoli, Segunda (31/10).
Rona katak membru F-FDTL ida komete aktu hanesan ne’e, komandu PNTL Munisipiu Lautem informa kedan situasaun ne’e ba Komandante Jeral PNTL no parte Komandu PNTL kontaktu kedas ba Xefe Estadu Maior Jeneral F-FDTL kona ba problema ida ne’e.
Iha akontesimentu ne’e membru PNTL sira kaer tiha soldadu ne’e (oknum) no hatama iha sela depois hein Polisia Militar (PM) to’o iha fatin mak sira entrega ba Polisia Militar.
“Kona ba prosesu displinar nian internal Komandu F-FDTL mak sei fó ba nia soldadu.” tenik Hornay (anu)
