Remitánsia Pekeru TL iha Australia – Korea Selatan to’o liu $15 milhão iha 2025
TIMOROMAN.COM-Timor-Leste iha tinan 2025 simu remitánsia liu husi $15 milhão dolar Americanu husi pekeru migrante Timor-Leste ne’ebé servisu iha Australia no Korea Selatan (Korsel) liu husi programa Sekretáriu Estadu ba Formasaun Profisionál no Empregu (SEFOPE).
Diretór Nasionál Empregu Estranjeiru SEFOPE, João Correia Pereira, hateten katak benefísi servisu iha liur la deit sente diretu husi pekeru no familia sira, maibé mos fó kontribuisaun signifikativu ba ekonomia nasionál liu husi remitánsia ne’ebé sira haruka kada tinan.
“Iha tinan 2025, pekeru sira ne’ebé servisu iha Korea Selatan no Australia haruka osan liu husi $15.275.013,64 dolar Americanu. Entretempo, total remitánsia ne’ebé simu husi tinan 2018 to’o 2025 to’o $101.483.112,54 dolar Americanu,” dehan João Correia Pereira ba TATOLI husi nia ofísio iha City8, Manleuana, Dili.
“Iha tinan 2025, pekeru sira ne’ebé servisu iha Korea Selatan no Australia haruka osan liu husi $15.275.013,64 dolar Americanu. Entretempo, total remitánsia ne’ebé simu husi tinan 2018 to’o 2025 to’o $101.483.112,54 dolar Americanu,” dehan João Correia Pereira ba TATOLI husi nia ofísio iha City8, Manleuana, Dili.
Nia esplika katak iha tinan 2025, iha rekord 4.840 pekeru Timor-Leste haruka remitánsia husi Australia, entretempo 791 pekeru husi Korea Selatan.
Tanba ne’e, Governu Timor-Leste mos komesa hodi espandi kolokasaun empregu ba Japão. Iha tinan 2025, iha 64 pekeru ne’ebé haruka atu servisu iha nasaun ne’e, ho tolu ona fila ba Timor-Leste no agora seidauk iha 61 pekeru ne’ebé servisu aktivu iha Japão.
Antes, iha loron 21 Marta 2025, Banku Sentral Timor-Leste (BCTL) fó dadus ne’ebé hatudu katak pekeru Timor-Leste iha nasaun barak, inklui Korea Selatan, Australia, Irlanda, Reinhu Unido, no nasaun seluk, ona haruka remitánsia liu husi $244,8 milhão dolar Americanu durante tinan 2024.
“Remitánsia husi maun-alin sira ne’ebé servisu iha liur rai monta $244,8 milhão dolar Americanu. Numeru ida ne’e reprezenta 14,5 porsentu husi Produto Doméstiku Brutu (PDB), no ida ne’e mak kontribuisaun boot liu,” hateten Governadór BCTL, Helder Lopes, bainhira lança Relatóriu Desenvolvimentu Ekonomia Timor-Leste 2024 iha Edifisiu Ministériu Finansas, Aitarak-laran, Dili.
Tuír dadus BCTL (Banku Sentral Timor-Leste), remitánsia boot liu iha tinan 2024 mai husi Reinhu Unido liu husi $100 milhão dolar Americanu, tuir Australia $61 milhão dolar Americanu, Korea Selatan $44,8 milhão dolar Americanu, no $39 milhão dolar Americanu husi nasaun seluk.***
