UNTL Sei Investiga Dosente Dupla Servisu
Timoroman.com-Dosente hamutuk ema na’in sanulu (10) husi Universidade Nasional Timor Leste (UNTL) deskonfia dupla servisu, ne’e duni husi parte Universidade forma ona ekipa hodi hala’o investigasaun.
“Daudauk ne’e ekipa ida husi UNTL halo hela invetigasaun ba iha instituisaun hotu-hotu, tantu instituisaun publika no privada. Felismente rejultadu investigasaun seidauk hato’o, maibé dadus preliminar dehan katak iha duni dosiente balun mak dupla servisu.” dehan Reitor Universidade Nasional Timor Leste (UNTL), Francisco Miguel Martins ba jornalista sira hafoin remata inkontru ho Primeiru Ministru Rui Maria de Araujo iha salaun inkontru Ministru Edukasaun, Villa Verde, Kinta-Feira (17/11).
Reitor UNTL ne’e haktuir, husi nia parte seidauk bele hola uluk desizaun, antes Konsellu Jeral no Departamentu Disiplinar avalia ka apresia dosente hirak ne’e ninia lala’ok.
“Ita foin mak halo prediksaun liu husi verifikasaun klean ida no ha’u hanoin ida ne’e ladun di’ak, ne’e duni ita bele husu ba dosente hirak ne’e hakarak kontinua servisu iha ka iha ne’eba.” tenik Francisco Martins.
Bainhira inisiativa husi dosenti ida hakarak ba servisu iha instituisaun seluk, mais nia utiliza ba iha loron sabadu ho dominggu, ida ne’e la iha buat ida, maibe loron ida formal Segunda to’o Sesta ida ne’e la diak tanba nia abandona servisu ne’ebé tuir lolos atu halo.
“klaru oras ne’e ami identifika tiha ona katak, iha dosente hamutuk ema na’in 10 ne’ebé mak destakamentu iha instituisaun publika, hanesan iha Funsaun Publika, Parlamentu Nasional no Ministeriu balun.” Tenik Francisco Martins.
Destakamentu ne’e aban bain rua sira sei fila-fali mai halao sira nia knar hanesan babain kuandu governu utiliza tiha sira nia kompetensia para atu dezenvolve instituisaun publika.
“Pruzemplu hanesan adidu ba iha Edukasaun no Turismu, buat hirak ne’e solitasaun mai husi Governu ita aturiza ita nia ema ba halo asistensia iha administrasaun publika sira, iha rai laran tantu iha mos rai liur,” esplika Francisco.
Antes ne’e Prezidente Komisaun Funsaun Publiku (KFP), Faustino Cardozo esplika, oras ne’e daudaun sira sei hein medidas husi UNTL nian ba situasaun ida ne’e.
“Ami hein nafatin klarifikasaun funsionariu ka dosente balun ne’ebe mak hala’o servisu asesoria permanenti iha instituisaun seluk, entaun UNTL buka para fó klarifikasaun kona ba ida ne’e.” esplika, Faustino.
Bainhira husi parte UNTL mak hateten loloos ona kona ba situasaun ida ne’e, komisaun sei hola medidas, tanba tuir lei, nu’udar dosente labele hala’o servisu ne’ebé prejudika servisu professional dosente nian. (sal)
