Difini Fronteira Telestre, Dezembru TL-Indoensia Asina Konkordansia
Timoroman.com- Tuir planu iha fulan Dezembru tinan ida ne’e, Governu Timor-Leste (TL) ho Indonezia sei asina konkordansia ida kona ba disputasaun Fronteira Terrestre (FT) hodi difini loloos fronteira terrestre entre nasaun rua ne’e.
“Negósiasaun ida ne’e importante mak komunikasaun no ita agradese tanba Governu TL halo negósiasaun ida seriu ho Jakarta purke konsege konvense ita ninia negósiador sira, liu-liu ita nia negósiador principal, Kay Rala Xanana Gusmão.”dehan Prezidente PN, Adérito Hugo Tersa iha PN.
Hugu haktuir, akordu ne’e ho objetivu atu finaliza disputa fronteira terrestre entre Timor-Leste ho Indonezia nian, ne’e duni espera katak konkordansia ne’e bele realiza duni iha tempu badak.
Lori PN nia naran hato’o agradesimentu bo’ot ba negósiador prinsipal sira tanba konsege finaliza ona sira nia negósiasaun seriu maske la públika iha média.
Iha parte seluk, Deputadu Frente Mudança, José Luis Guterres hateten, hahú iha primeiru Governu Konstitusional nia ukun to’o iha VI Governu, Timor-Leste esforsu makas no ninia rejultadu hatudu katak, iha fulan Dezembru tinan ida ne’e sei asina konkordansia kona ba fronteira terrestres.
Eis MNEK sente kontenti ho prosesu ida ne’e, tanba Timor-Leste ho Indonesia konsege hatudu sira nia vontade hodi halo negósiasaun kona ba fronteira terrestre.
“Ha’u hanoin prosesu ida ne’e kuandu ita asina ona se kria estabilidade ba ita nia rai, kria mós sertezas ba ita nia ema ne’ebé iha fronteiras. Jestaun seguransa no estabilidades ne’e pertense ba nasaun idak-idak nian” dehan eis MNEK, José Luis Guterres.
Aleinde ne’e, Membru Deputadu Bankada FRETILIN, David Dias Ximenes “Mandati” hateten, nia rasik mós simu ona informasaun kona-ba Timor-Leste hó Indonezia sei asina konkordansia kona-ba fronteira terrestre ne’ebé sei hala’o iha Naktuka.
“Ha’u mós rona ona sei halo festa iha Naktuka, karik ida ne’e akontese ita sanggat bertrimakasih, ha’u iha esperansa katak ida ne’e harus terjadi.”dehan David Dias Mandati.(jax)
