Infraestrutura Foun ba Produsaun Arroz no Aksesu Aeroportu Baucau
TIMOROMAN.COM-Primeiru-Ministru Kay Rala Xanana Gusmão inaugura projetu importante iha loron 9 no 10 Janeiru 2026, inklui sistema irrigasaun iha Laivai, Munisípiu Lautém, no Galata, Munisípiu Baucau, hanesan mos reabilitasaun estrada Caravela–Caicido–Aeroportu Baucau. Projetu sira ne’e parte husi investimentu infraestrutura atu suporta produsaun agrikultura no aumenta mobilidade lokal.
Iha Laivai, sistema irrigasaun ne’ebé inaugura iha loron 9 Janeiru sei fornese bee ba 500 hektare to’os hare iha suku Ililai no Euquisi, Postu Administrativu Lautém. Projetu ida ne’e parte husi polítika Governu Konstitusionál IX ne’ebé orienta ba modernizasaun agrikultura no aumenta produsaun arroz nasional. Iha ceremonia, Primeiru-Ministru sublinha importánsia obra ne’e ba aumenta produsaun ai-han no reduz importasaun arroz, no apela ba agricultor sira atu garante utilizasaun no manutensaun diak sistema irrigasaun.
Iha tempu hanesan, governu mos distribui equipamento agrikultura ba agricultor sira, inklui trator no máquina semeio no kolheita arroz, atu reforsa mekanizasaun no suporta produtividade iha área beneficiáriu. Projetu Laivai ne’e custa 9,36 milhãu dólar Americanu. Melio de Jesus, Prezidente Autoridade Munisípiu Lautém, kontente tanba governu konsege kria kondisaun ba povu Lautém, especial iha suku rua ne’e, ne’ebé permite reativa hektare to’os ne’ebé abandona ona durante 20 tinan, no sei aumenta produsaun arroz iha futuru.
Iha Galata, suku Uato-Haco, Postu Administrativu Venilale, Primeiru-Ministru inaugura iha loron 10 Janeiru sistema irrigasaun ne’ebé sei beneficia 720 hektare to’os hare, abrangendo postu administrativu haat iha Munisípiu Baucau, inklui Ossu iha Munisípiu Viqueque. Durante inaugurasaun, Primeiru-Ministru foin sublinha nesesidade servisu hamutuk no preservasaun infraestrutura. Projetu ida ne’e custa 14 milhãu dólar Americanu.
Mos iha Baucau, iha loron 10 Janeiru, Primeiru-Ministru inaugura reabilitasaun estrada Caravela–Caicido–Aeroportu Baucau, ho naruk oito kilometru, no apela ba autoridade no populasaun atu akompanha konservasaun via ne’e. Projetu ne’e financiadu hosi Ministériu Planeamentu no Investimentu Estratéjiku liu husi Fundo Infraestrutura, ho custa 6 milhãu dólar Americanu, no mos iha fiscalização no supervisão ADN, IP.
Inaugurasaun iha Lautém no Baucau parte husi esforsu governu atu reforsa infraestrutura baze ba suporta produsaun agrikultura no melhora kondisaun mobilidade, ho participasaun membru governu, autoridade munisípiu no lokal, representante institusionál no komunidade beneficiáriu.***
