Agrifino Marçal Eleitu Ba Kordenador KESA

TIMOROMAN.COM-Klibur Estudante Sub-Distrito Alas (KESA) hili Agrifino Marçal nu’udar kordenador ba estrutura periodu 2017- 2019, ho votus 41 kontra 1, liu husi kongresu extra-ordináriu loron ida, iha Uma Nahe Biti Bo’ot, eis Sekretaria Estadu Joventude no Desportu (SEJD) Sional Lecidere – Díli Domingu (22/10).
Prezidente eleitu  iha nia diskursu ho konviksaun, hateten sei kumpri mandatu ne’ebé hatur iha estatutu, no sei servisu hamutuk ho parte hotu, sobretudo fundadores, no alumni KESA, hodi tau matan ba povu no rai Alas, ne’ebé durante ne’e la asesu ba dezemvolvimentu.

“Hau rasik la iha vijaun, tanba vizaun no misaun hatur hotu ona iha estatutu KESA nian. Kumpri deit saida maka iha ona estatutu, saida maka iha ona rejimentu. Kaer ba ita nia lema kongressu ninian katak, La Mesa-Mesak Sirit Ai Tehen. Hodi Malu ho Malu Sirit Ai Tehen  maka, ami prontu kolabora hamutuk ho membru hotu-hotu, ho entidades autoridades lokais postu ninian, konselleiru, fundadores, alumni sira, atu kolabora, para ita atu hadi’a ba ita nia rain alas”, Kordenador Marçal promete,  depois de eleze iha oras tuku (23:30) iha Lecidere -Díli.

Fundador KESA ao mesmu tempu Prezidente da meza kongresu Dr. Viriato Seac , wainhira transfere mandatu ne’e ba estrutura foun husik ho mensajem, katak “ Bali no Koidadu ba hanesan ita hotu nian, karik buat ruma menus, hatete, para ita hatutan, ha-resi ba. Ida ne’e maka riku soi KESA nian hari husi fundador sira iha 2004. Dehan Seac ao mesmo tempo entrega atributu simbolikamente ba kordenador eleitu iha tuku (23:45).
Entertantu Eng. Damaso A. Pereira, (fundador) iha ninia diskursu abertura mos fo karajem ba estudante atu, uza rekursu ne’ebé iha, hatutan buat ne’ebé KESA halo ona iha tempu defisil, no hodi ba futuru.

“Tinan naruk, wailoro narauk tempu defisil iha situasaun susar no kiak, menus buat hotu tantu rekursu ema nian material no buat hotu, mas ami firmi, bolu malu tur hamutuk, kolia husi mehi ba mehi, liafuan ba liafuan, hakerek ba hakerek, planu ba planu, too ikus konsege realiza duni organizasaun ida ne’ebé ho moto Matenek Modi Madia. Agora dadauk ne’e ita iha rekursu ne’ebé naton, ami husu ba alin oan kesa ne’ebé foin sae, atu kontinua buat ne’ebé maka diak uluk halo ona, no ba futuru. Ami sira fundador nafatin atu hamutuk ho imi, atu suporta imi kualker tempu tuir ami nia kbiit nebe maka iha, tuir lema ‘La mesa-mesak sirit ai-tehen, hodi ho malu sirit ai-tehen’” dehan  Damaso.

Nia introdus mos katak KESA hari iha 27 de Dezembru 2004, hanesan klibur estudante atu halibur intelektuais alas oan sira, hodi hamutuk ba servi rai Alas, hodi atinji vizaun Timor – Leste nian atu tranforma povu timor – leste sai pais rendementu media altu, povu sira moris saudavel, moris ho matenek ho moris ho hakmatek.
Nia rezumu kontribuisaun ne’ebé kesa halo durante tinan 10 resin ezistensia maka programa animasaun sira hanesan desportu, kadi-kakutak, ajuda volutariamente ba hari eskola rua iha alas maka eskola eskola teknik vokasional agrikultura Dotik, no eskola ensinu sekundariu santo antonio Alas, azuda atividade igreza alas. Damaso haktuir.
Entertantu estrutura KESA periodu 2017-2019 nian kompostu husi Agrafino Marçal (Prezidente), Joél Fernandes (I Vise ) Graciano Bocase (II Vice), Jose da Costa Xavier (III Vice), Belarmino Marquês (IV Vice), Ana da Costa (Dep. Komunikasaun no Relasaun Publika), no Marciano da Costa (Dep. Servisu Corporativas).
“Labele Muda Igreza No Postu Alas”

Reprezenta inan aman husi Alas, Eduardo da Costa, husu ba kamada intelektuais Alas nian atu dezemvolve Alas hanesan postu seluk, i husu labele muda igreza no administrasaun postu alas, wainhira partisipa iha kongresu estraodinariu KESA iha Uma Nahe Biti Bo’ot Domingu (22/10).
“Hau nia laran ne’e konteentii, luak, hanesan tasi. Ho ksolok, ho hadomi ba imi tomak iha fatin ida ne’e,. Ami katuas ferik sira ne’ebé iha rai alas, ne’ebé sei moris, balun ne’ebé mate tiha ona, toba hodi hein, haksolok hodi hein, halerik hodi hein, ba imi atu estuda hodi sai matenek, hodi fila ba hadia ita nia rai Alas, sai kabér, sai dalan diak, hanesan ema seluk nian.
Ami iha ami nia esperansa tomak, laran ksolok tomak ba imi, atu unidade respeitu ba malu, katak ida ne’e halo ita hotu halo.
Buat ida hau husu liu-liu maka ne’e alin sira. Postu alas labele muda, igreza alas labele muda. Hateten Eduardo liu husi ninia intervensaun.
Nia haktuir katak,  tuir ita nia istoria rai Alas, Igreja hahu uluk iha Alas, depois maka ba Soibada, depois maka foin to’o ba Fuiluru. Tanba nee maka ita tenki defende ita nia istoria. Edurdo husu.
Nia reafirma tan, hanesan inan aman nia kontenti, hodi sira (inan-aman) hotu nia naran, nia  hein, aban bainrua estudante hamutuk hodi alas ba oin, hanesan sidade ida diak liu tan, kaber liutan, hanesan ho ema rai seluk ninian” Eduardo hakotu.(pol)

Leave a Reply

Your email address will not be published. Required fields are marked *