Governu Extende Mandatu Jeneral Lere

TIMOROMAN .COM– Setimu Governu  desidi extende mandantu Xefi Estadu Maior Jeneral  Falintil-Forsa Defeza Timor Leste (F-FDTL) Lere Anan Timur  ba tinan  ida, liu husi reuniaun Konsellu Supreior Defeza no Siguransa (KSDS).

Primeiru Ministru (PM) Mari Bin Amude Alkatiri, hateten mandatu xefi estadu maior jeneral F-FDTL, sei extende tan ba tinan ida, nomos sei halo revizaun ba lei hirak ne’e.
Tanba, VI Govenu extende ona mandatu Jeneral Lere tinan rua, hahu husi dia 7 Outobru 2015 no sei termina iha dia 7 Outobru 2017.

“Ami  foin lalais ne’e reuniaun KSDS aprova rejulusaun hodi extende tan mandantu Jeneral Lere Anan Timor ba tinan ida,” informa PM Alkatiri ba jornalista,  bainhira hasoru malu ho Prezidente Republika, Francisco Guterres ‘Lu Olo’ iha Palaasiu Prezidensial  Bairo Pite Dili,Kinta (05/10).

Xefi Governu hatutan, agora proposta Governu hato ona ba iha Prezidente Republika Lu Olo, tanba Prezidente Republika mak sei dekreta no nomea ema no hodi fo posse.

Sikun seluk  Adjuntu Fundasaun Mahein (FM) João Almeida ba jornalista, iha   nia servisu fatin Fomento, Kinta, horseik, katak  tuir estatutu militar F-FDTL nian artigu 195 No 2/10, sira ne’ebe mak iha kargu hanesan xefi estadu Maior Jeneral ho nia vise no Xefe Estadu Maior, komandante komponente, bainhira sira nafatin halo funsaun, bele halo rekerementu no bele hanaruk tan tinan ida, ida ne’e lei fo dalan.

“Ita hotu akompaña husi Governu rasik no partikular Ministeriu Defeza hato’o katak sei halo extensaun ba mandatu Jeneral Lere, hau hanoin ida ne’e lei fo dalan,” relata  adjuntu FM ne’e.

João dehan, papel importante ida husi Governu atu bele lori prosesu ne’e rasik to konkluzaun final desizaun final Prezidente Republika nian.

Tanba, Prezidente Republika mak iha kbit instituisional atu nomea ou ezenora no halo extensaun ba mandatu Xefi Estadu Maior Jeneral ho ninia Vise.

Nune’e mos Jurista Timoroan, Manuel Tilman, hateten emprinsipiu la’os kontra lei, lei hotu-hotu bele iha esesaun. Signifika, razaun fundamental ne’ebe agora VII Governu hetan karik buat ida bolu naran motivu forsa maior.

Tuir nia, motivu forsa maior ne’e bele hanesan ne’e, la hetan ema ida atu subtitui agora, ida seluk mak jeneral Lere mos sei bele fo tan tinan ida ou rua husi ninia esperensia rasik, atu kaer metin F-FDTL.

“Ita hare didiak F-FDTL ho PNTL ne’e trenamentu ne’e seidauk metin, tanba, forsa rua ne’e mak baze ba estabilidade nasaun nian” esplika Manuel Tilman.

Entertantu observador Politiku Universidade Nasional Timor Leste (UNTL) Camilo Ximenes husu ba Governu la’os atu extende deit ninia mandadu jeneral Lere. Maibe, hasae tan ninia deviza ne’ebe mak a’as liu, hodi nune’e para ema ne’ebe mak atu troka jeneral ne’e bele hare se mak iha posibilidade.

Extende Mandatu

Vise Xefe Estadu Falentil Forsa Defeza Timor-Leste (F-FDTL) Brigadeiru Filomeno Paixão,  informa  katak  mandatu Xefe  Estado Maior Jeneral F-FDTL Lere Anan Timur posibilidade sei extende tan tinan ida.

“Konaba mandatu ne’e iha ona sinais katak mandatu Xefe Estadu Maior Jeneral Lere, ho nia vise sei iha prolongasaun mandatu ba tinan ida no rua, maibe, ida ne’e depende ba lei,” afirma  Brigadeiru Filomeno Paixão ba jornalista, bainhira partisipa misa aniversariu ba Mahein Forsa Defeza Timor-Leste  São Miguel,   iha Kuartel Jeral F-FDTL, Fatuhada, horseik.

Nia dehan, atu to’o tinan hira ne’e konforme lei hateten, portantu bele ba tinan ida, bele ba tinan rua. Maibe, nia dehan, to’o oras ne’e nia sedauk simu karta husi Prezidente Republika Lu Olo kona ba karta mandatu ne’e.

“Kuandu hau simu hau sei fo deklarasaun no fo infromasaun ba ita boot sira (Media-red),” tenik Vise Xefi Estadu F-FDTL  ne’e. (sal/mar/anu)

Leave a Reply

Your email address will not be published. Required fields are marked *