PN La Aplika Lian Portugues

TIMOROMAN.COM – Diretor Departamentu Formasaun Profesores do ensinu baziku, Lourenço Marques da Silva, hateten Parlamentu Nasional (PN) sira mak halo lei, maibe la aplika lian portugues ne’ebe konsagra ona iha konstituisaun Republika Demokratika Timor-leste(RDTL).

Tuir nia,  inportante tebes ba PN ho instituisaun Governu sira mak tenke hatene lian portugues tanba sira mak halo lei sira tenke aplika.

“Ita nia lian tetun bele uza bainhira iha plenaria, maibe labele haluha lian portugues tanba sira mak halo mais la aplika lian ne’ebe konsagra ona iha kontituisaun RDTL,” afirma Lourenço Marques ba jornalista, iha UNTL, Kinta(7/9).

Nia dehan, lian portugues obrigatoriamente  ba se de’it atu uza lian portugues, maibe barak liu mak uza lian tetun la tuir sistema gramatika tetun ninian no barak liu uza lian tetun dezvia husi norma no regra, mais portugues nia estrutura ne’e fiksu no gramatika mos fiksu ona.

Nia mos husu ba membru PN no Governu la’os uza de’it tetun mais hanesan deputadu sira no Governante sira mak fo ezemplu di’ak no motiva foinsa’e sira atu ko’alia portugues, labele sira halo tia lei mais aplika diaria sira halo finji la liga, ne’e hanesan atitude ida la furak ba foinsa’e sira.

“Se povu fo fiar ona ba politika  nain sira ba tuur iha parlamentu tenke esforsu mak aplika saida maka konsagra ona iha konstituisaun, atu nune’e sira la’o tuir dalan,” katak nia.

Lourenço  hatutan,  membru parlamentu sira durante tinan lima la ko’alia portugues ida ne’e hanesan problema ida, entaun presiza resolve liu husi kestaun polítika.

Tan ne’e nia rekomenda ba deputadu foun atu aplika uluk saida mak adota ona no konsagra ona iha konstituisaun RDTL.

“Durante ne’e iha plenaria deputadu ida sa’e no prezidenti Parlamentu ida sa’e tuir sira nia hakarak maibe la hare ba konteudu konstituisaun RDTL iha artigu 13, sira nega la utiliza portugues,”subliña Lourenço. (mey)

Leave a Reply

Your email address will not be published. Required fields are marked *