Komjer PNTL, Informa Kazu Raikotu Ba PR  

DILI (Timoroman) – Komandante Jerál (Komjer) PNTL, Komisáriu Julio da Costa Hornay, Kuarta (08/03) hasoru malu ho Prezidente da Repúblika (PR). Komjer PNTL informa ba PR, kona-ba kazu Raikotu. 

“Iha enkontru ho Prezidente Taur, ha’u mós informa kona-ba kazu Raikotu no mós atividade autostop ne’ebé parte PNTL halo durante tempu kampaíña. Ohin ha’u informa situasaun hirak ne’e, ba Prezidente da Repúblika,” hatete Komisáriu Julio ba jornalista iha Palasiu Prezidente, Aitarak-Laran, Dili.

Tuir Komjer Julio, PNTL lori ona autór ida hosi kazu ne’ebé akoñtese iha Raikotu, Sesta (03/03) ba Tribunál Distrital Dili (TDD) atu aprezenta an periodika, enkuantu autór na’in haat (4) seluk, ne’ebé sei hein mandatu kapturasaun hosi Ministériu Públiku (MP).

Kona-ba situasaun seguransa durante kampaíña, Komjer ne’e dehan, PNTL ninia knaar atu mantein nafatin seguransa. “Ho nune’e, bele asegura kampaíña la’o tuir nia dalan. Atu nune’e, hatudu ba mundu katak, Timor-Leste mós bele, eleisaun mós bele la’o ho di’ak no estabilidade,” Komjer Julio hatete.

Iha fatin hanesan, Ministru Interior (MI), Lounginhos Monteiro hateten autór sira ne’ebé iha ligasaun ho kazu Raikotu tenke assume ninia responsabilidade. “Maibé, ha’u la hatete katak autór sira ne’e mak se? Maibé, tuir lei, ema se de’it mak halo krime, tenke assume nia responsabilidade,” MI ne’e dehan.

Tuir MI, iha regras foun sei implementa. Motor hotu-hotu tenki ho kondisaun tuir kódigu estrada. Motor ne’ebé uza kanu (knalpot) racing sei la autoriza tan. “Bandu totalmente no disiplina bainhira tuir kampaíña. Tenke tuir dalan. La’o, tenke iha liña ida de’it, labele fó perturbasaun ba ema seluk ninia direitu bainhira uza estrada, ka dalan públiku sira,” MI ne’e dehan tan.

Iha tempu hanesan, Xefi Estadu Maior das F-FDTL, Major Jeneral Lere Anan Timur, akompaña hosi Brigadeiru Jeneral Filomeno Paixão, informa mós ba Prezidenti da Repúblika kona-ba situasaun seguransa. Liuliu, relasiona ho situasaun durante kampaíña ba eleisaun presidensiál. (viq)

Leave a Reply

Your email address will not be published. Required fields are marked *