Vitima Raikotu Seidauk Hetan Ajuda MSS

DILI (Timoroman) – Xefe Suku Comoro, Eurico da Costa hatete to’o agora, Ministériu Solidariedade Sosiál (MSS) seidauk fó ajuda, ba vitima ne’ebé sira-nia uma hetan estragus iha área Raikotu, Aldeia Terra Santa, Suku Comoro.

“Iha komunidade uma kain 36 mak hetan estragus iha Raikotu. Uma kain hirak ne’e, to’o agora seidauk hetan asistensia umanitariu emerjensia hosi MSS,” hatete Eurico da Costa ba jornalista, Tersa (07/03) iha Sede Suku Comoro, Dili.

Tuir Eurico, depois de akoñtesementu iha Sesta (03/03) lorokraik, nia ho ekipa MSS nian halo kedas prosesu levantamentu, liuliu kona-ba uma no sasán ne’ebé hetan estragus.

“Ha’u emadiatu informa ona ba Prezidente Autoridade Munisípiu Dili no mós ba dirijente MSS, atu fó asistensia ba komunidade iha área refere. Mais, to’o agora seidauk hetan resposta,” Eurico dehan.

Iha sorin seluk, Prezidente Autoridade Munisípiu Dili, Gaspar Soares hateten ba familia vitima ne’ebé afetadu husi konfrontasaun iha Raikotu, nia mós fó hatene ona ba iha parte MSS, hodi fó asisitensia emerjensia.

“Ha’u mós informa ona ba parte MSS. Liuliu ba diresaun ne’ebé trata ba asuntu ajudus umanitariu, hodi bele fó asisitensia umanitariu emerjensia, relasiona ho konfrontus ne’ebé akoñtese iha Aldeia Terra Santa, Suku Comoro nian,” dehan Gaspar.

Xefe Aldeia Terra Santa, Esperansa de Jesus ba diáriu ne’e hatete, ekipa MSS ladauk fó sasán balun hodi ajuda komunidade vitima, relasiona ho konfrontus ne’ebé maka akoñtese iha Sesta 903/03) liubá.

Hatán ba preokupasaun ne’e, Domingas nu’udar ekipa vokal point MSS ba Postu Administrativu Dom Aleixo dehan, nu’udar ekipa MSS nian, kuandu hetan ona autorisazaun husi diretór MSS, ami pronto fó apoiu ba vitima konfrontasaun Raikotu. (rys)

Leave a Reply

Your email address will not be published. Required fields are marked *