Militár, Labele Envolve GAM

DILI (Timoroman) – Ministru Defeza, Cirílo Cristóvão husu ba membru F-FDTL tomak, atu labele envolve an iha Grupu Arte Marsiais (GAM), bainhira sai membru militár ativu.

Ministru Defeza konfirma lia hirak ne’e iha aniversariu Componente Apoiu Servisu (CAS) F-FDTL ba dala VI, Segunda (06/03) iha Metinaro, Munisípiu Dili. “Sei Tersa (07/03) Parlamentu Nasionál aprova Lei atu kriminaliza arte marsiais, komesa oin ba oin laiha tan membru militár ida, mak envolve nia an iha GAM,” Cirilo dehan.

Lei ne’ebé kriminaliza GAM, bandu membru Militár, PNTL no funsionáriu públiku atu envolve an iha GAM. Membru hosi intituisaun tolu ne’e mak envolve hodi komete krime GAM nian, modura sei fó dobru. “Ba ema ne’ebé normal, sei hetan kastigu tinan tolu (3). Ba membru F-FDTL, PNTL no funsionáriu públiku sei hetan kastigu tinan 6,” Ministru Defeza ne’e afirma.

Lei ne’ebé kriminaliza GAM ne’e, tuir Cirilo, hodi haforsa tan disiplina no profesionalismu no intermus kapasitasaun ba instituisaun hanesan F-FDTL, PNTL mós funsionáriu públiku.

“Tan ne’e, forsa ida-idak tenke iha kapasitasaun espiritual imi nia an rasik. Membru F-FDTL barak mak sei joven hela. Tenke aproveita oportunidade, hodi bele aprende no estuda didi’ak. Para bele sai forsa, ne’ebé profisionál iha pais ida ne’e,” Ministru Defeza ne’e hateten. (anu)

Leave a Reply

Your email address will not be published. Required fields are marked *