PNTL Prende Motor 199, Karreta Governu 1

DILI (Timoroman) – Polísia Nasionál Timor-Leste (PNTL) Munisípiu Dili, Domingo (05/03) prende motor hamutuk 199 no karreta Estado ida (1) bainhira halo autostop iha área estatua Prezidente Nicolau Lobato, Comoro.

Hosi motor hirak ne’e, 48 mak uza kanu resin, 151 kontra regras tranzitu inklui karreta ida ho xapa matrikula Governu, ne’ebé sirkula iha loron feriadu.

“Ami halo planu masimu, hodi garantia seguransa ba kampaiña eleisaun presidensiál nian,” hatete Adjuntu Komandante PNTL Munisípiu Dili, Superintendente Assistente Euclides Belo ba jornalista iha Komandu PNTL Munisípiu Dili, Segunda (06/03).

Tuir Euclides, motor ne’ebé uza kanu racing hirak ne’e, barak liu mak hosi apoiantes kandidatu Prezidente númeru sorteu 2, ne’ebé atu partisipa kampaiña iha Munisípiu Liquica.

“Amo mós hetan apoiu masimu hosi Unidade Espesiál Polísia (UEP), uidade tranzitu no mós eskuadru haat iha Dili laran,” nia hatete tan.

Kona-ba bainhira mak PNTL Munisípiu Dili bele entrega filafali motor no mós karreta hirak ne’e, Euclides hatán, ninia parte hein de’it justifikasaun hosi motor no karreta na’in.

“Mais, tenke lori ho dokumentus kompletu atu halo justifikasaun, para bele ba selu multa iha banku,” nia dehan.

Operasaun ne’ebé PNTL halo ne’e, tuir Euclides, jeral ba kualker motor ne’ebé mak uza kanu racing no kontra regras tranzitu. Inklui mós motor ka karreta Governu nian, ne’ebé mak uza iha loron feriadu. (anu)

Leave a Reply

Your email address will not be published. Required fields are marked *